Азат Перуашев «Ақ жол» партиясының төрағалығынан кететінін мәлімдеді

Астанада өткен «Ақ жол» Қазақстан Демократиялық партиясының съезінде партия төрағасы Азат Перуашев өз өкілеттігін тапсыратынын мәлімдеді. Бұл туралы Bes.media-ға сілтеме жасап Politico.kz хабарлайды.

Саяси ұйым жетекшісі бұл шешімді басшылық құрамды жаңарту және ішкі партиялық жүйедегі монополияның алдын алу қажеттілігімен түсіндірді.

«Бұдан былай біз бүгінгі шындықты өзгертетін оқиғалар ағымындамыз. Бірақ монополия бұған кедергі келтіруі мүмкін. Ал монополияға қарсы ең жақсы ем – басшылықтың мерзімді ауысып тұруы», – деді Азат Перуашев.

Партия жетекшісі ұйымның ішкі дамуын тежемеу маңызды екенін жеткізді.

«Сондықтан, өз-өзімізбен тұйықталып қалмау және жаңа идеялар мен серпіндерді тежемеу үшін мен партия төрағасы өкілеттігін тапсыру туралы шешім қабылдадым», – деп түсіндірді ол.

Сонымен қатар Азат Перуашев бұл қызметке Дания Еспаеваның кандидатурасын ұсынып, оның қазіргі Қазақстан саясаты мен экономикасындағы жаңа тәсілдердің бастамашысы ретіндегі рөлін атап өтті.

«Дания ханым – қазіргі саясат пен экономикадағы Қазақстанның жаңа үрдістері мен дәстүрлерінің бастаушысы, пионері», – деді Азат Перуашев.

Перуашев үміткердің жеке қасиеттері мен қабілетіне жоғары баға берді.

«Оның таланты, интеллектісі, дұрыс шешім таба білуі, алға ұмтылу батылдығы және өзіңе до дейін мүмкін емес деп есептелген нәрсені бірінші болып жасаудан қорықпауы партиямызға жаңа серпін, жаңа оң өзгерістер әкелетініне күмәнім жоқ», – деп мәлімдеді ол.

«Ақ жол» партиясының мүшесі Меруерт Қазбекова Дания Еспаеваның кәсіби әрі жеке қасиеттерін ерекше атап өтіп, оның басқарушылық қызметке сайлануын қолдады.

Азат Перуашев кім?

2011 жылдан бері «Ақ жол» партиясын басқарып келген Азат Перуашев 1967 жылы 8 қыркүйекте Жамбыл облысының Қордай ауданында туған. Ол – саясаттанушы, экономист, мемлекеттік басқару маманы, саяси ғылымдардың кандидаты және Парламент Мәжілісінің VIII шақырылымының депутаты. Әр жылдары Президент Әкімшілігінде, «Қазақстан Алюминийі» компаниясының басшылығында және «Атамекен» кәсіпкерлер одағында қызмет етті, ал 2012 жылдан бастап Мәжіліс депутаты болып үздіксіз сайланып келеді. Конституциялық реформа жөніндегі комиссияның мүшесі саналатын ол II дәрежелі «Достық», III және I дәрежелі «Барыс» ордендерімен марапатталған.

Дания Еспаева кім?

Азат Перуашевтың орнына ұсынылған Дания Еспаева 1961 жылы 5 наурызда дүниеге келген, экономист, 2023 жылдың наурызынан бастап Парламент Мәжілісі төрағасының орынбасары қызметін атқаруда. Алматы есеп-кредит техникумын және Қазақ мемлекеттік басқару академиясын бітірген ол БТА Банк пен Казкоммерцбанкте басқарушылық лауазымдарды атқарып, банк саласында 30 жылдан астам еңбек етті. Бұған дейін Ақтөбе облыстық мәслихатының депутаты болған, 2016 жылдан бері «Ақ жол» партиясынан Мәжіліс депутаты болып сайланып келеді және 2019 жылы Қазақстан тарихында президенттікке үміткер ретінде ұсынылған алғашқы әйел атанды. Сондай-ақ Конституциялық реформа жөніндегі комиссия мен Президент жанындағы Адам құқықтары жөніндегі комиссияның мүшесі болып табылатын Дания Еспаева «Құрмет», «Парасат» ордендерінің және бірқатар мемлекеттік медальдардың иегері.