"Бұл өмірімдегі ең қиын сабақ": Мұрат Бисембиннің жары жан сырын ақтарды

Белгілі қазақстандық актер, марқұм Мұрат Бисембиннің жары жолдасына деген сағынышын білдіріп, көпшілікпен жан сырын бөлісті, деп хабарлайды Politico.kz.

Актердің әйелі өзінің жазбасында сүйікті адамынан айырылудың қаншалықты ауыр екенін айтып, қазіргі сезімдерін баяндап берді.

"Маған таңдау қалдырмады. Мен тұтас бір өмірді сағынып жүрмін. Таңның қалай ататыны, "ояндың ба?" деген үйреншікті сұрақ, бірге ішкен шай, ұсақ-түйекті талқылау, кешке құрған жоспарлар жетіспейді. Қасымда өз адамым бар деген сезімді сағындым. Адамнан айырылған соң тек жүрек емес, бүкіл әлем өзгереді екен. Тіпті дүкендегі азық-түлікті де басқаша таңдайсың. Үстел басы тынышталып қалды. Үйдің іші де басқаша сезіледі. Сөйтіп өзің ешқашан таңдамаған мүлдем басқа өмірде сүріп жатқаныңды кенеттен түсінесің. Маған жиі "сен мықтысың" деп айтады. Бірақ мықтылық деген жыламау емес. Мықтылық деген құшақтау мүмкін емес адамды көргің келіп тұрса да, таңертең қайта орныңнан тұру. Мен оны жақсы көруді тоқтатқан жоқпын. Мен енді ешқашан жанаса алмайтын адамды жақсы көруді үйреніп жүрмін. Бәлкім, бұл өмірімдегі ең қиын сабақ шығар. Мен жай ғана қатты сағындым. Бұл сезім ешқайда кетпейді, ол жай ғана менің бір бөлшегіме айналды", – деп жазды марқұмның жары.

Еске сала кетейік, Мұрат Бисембин 2007 жылы шыққан "Рэкетир" фильміндегі Русланның рөлімен көрерменге кеңінен танылған болатын. Киноактер 2026 жылдың 8 қаңтарында Алматы қаласында 53 жасында дүниеден өтті. Өмірінің соңғы кезеңінде ол ұйқы безінің қатерлі ісігімен және инсультпен күрескен еді.