"Бумеранг міндетті түрде қайтып келеді": Әсет Матаев Татубаевтың қысымын еске алды

"Бұйрық бар, бәрібір қамаймыз": Әсет Матаев 2016 жылы Талғат Татубаев тарапынан қысым көргенін еске алды

Журналист Әсет Матаев өзінің Telegram-арнасында 2016 жылғы оқиғаларды еске алып, сол кездегі қысым мен билік өкілдерінің әрекеттері туралы ашық жазды. Ол Қаржы полициясы төрағасының орынбасары болған Талғат Татубаевпен екі рет кездесіп, оған 65-бап бойынша кінәні мойындауды ұсынғанын айтты. Бұл бап - өкініш білдіру арқылы қылмыстық жауапкершіліктен босату туралы.

Әсеттің айтуынша, сол кезде Жоғарғы соттың баспасөз қызметінің басшысы болған Болат Кальянбеков, "Қазақтелеком" вице-президенті Маханбетажиев, сондай-ақ Ақпарат комитетінің бұрынғы басшылары Берсебаев, Қазанғап, Байбосын мен Арпабаев - бәрі де Матаевтарға қарсы куәлік еткен. Олардың бәрі сол кезеңдегі билік элитасына жақын адамдар болған.

Көпшілігі бір күн уақытша изоляторда отырған соң, шартты түрде босатылған. Тек Болат Кальянбеков қана ауырып қалған себеппен ісі бөлек өндіріс ретінде қаралып, 2021 жылдың басында оның ісі жабылған. Қазір ол - Мәжіліс аппараты басшысының орынбасары.

Журналист Тамара Калеева да кезінде Кальянбековтің Матаевтарды кінәні мойындауға көндірмек болғанын растаған.

Татубаев алғаш рет Матаевпен Астанадағы әйгілі "Сейфуллин, 37" ғимаратында кездескен. Сол кезде ол "Бұйрық бар, бәрібір қамаймыз" деп қысым көрсеткен. Кейін Матаевтың әкесі ұсталған соң, Татубаев Алматыға келіп, оның телефонынан Әсетке хабарласқан. "Пікір білдірме, іс жабылады" деген уәде бергенімен, ол орындалмаған.

Осыдан кейін отбасы мен жақындарына қыспақ көрсетілген. Ақпарат тарату шектеліп, Татубаев телеарналарға шығып, "Матаев кінәсін мойындауға дайын болған" деп мәлімдеген.

Сол кездері тіпті кейбір шенеуніктер Матаевтардан Елбасы Нұрсұлтан Назарбаевтан кешірім сұрауды талап еткен.

Кейін Әсет Матаевтың әкесі түрмеден босап шыққаннан соң, медиафорумда Tengrinews басшысы Батыр Қазыбаев келіп, кезінде Әбіләзовқа қарсы материалдарды тапсырыспен жазуға мәжбүр болғанын айтып, кешірім сұраған.

Матаев бұл жазбаны кек алу үшін емес, ескерту ретінде жариялағанын жеткізді:

"Кім кекке сенсе, құдайға сенбегені. Бұл - тергеушілерге, прокурорлар мен судьяларға арналған ескерту. Бумеранг кешіксе де, міндетті түрде қайта оралады. Біреудің жақынына СИЗО-ға сәлемдеме апарып, лагерьдегі суық бөлмеде отырудың не екенін өз бастарынан өткеріп көрсін. Сонда ғана әділеттің дәмін түсінетін шығар."