Cessna Aircraft ұшағы апатқа ұшырап, жағажайға құлады

Бразилияда Cessna Aircraft ұшағы ұшу-қону жолағынан шығып, жағажайға құлап жарылды, деп хабарлайды POLITICO.KZ.

SHOT басылымының мәліметінше, апат Убатуба қаласындағы Гастан-Мадейра әуежайында орын алған. Ұшақ ұшу-қону жолағынан шығып, қалалық жағажайға құлағаннан кейін жарылған.

Ұшақ бортында бес адам болған. Ұшқыш оқиға орнында қаза тапты. Жолаушылар мен бірнеше демалушы жарақат алды. Зардап шеккендер арасында балалар да бар.

Куәгерлердің айтуынша, демалушылар жолаушыларды өз беттерінше құтқаруға тырысып, оларды ұшақ қалдықтарынан шығарып алған.

Алдын ала мәлімет бойынша, апатқа себеп болған жағдайлар – қолайсыз ауа райы мен жаңбырдан кейінгі ұшу-қону жолағының тайғақ болуы.