Чилилік «Димаш Құдайберген» көпшілікті таңғалдырды

22 жастағы Пабло Ромеро Чилидің Чильян қаласынан шыққан. Ол TVN телеарнасындағы әйгілі «Mi Nombre Es» пародиялық шоуында қазақстандық әнші Димаш Құдайбергеннің бейнесінде сахнаға шықты.

Байқау барысында Пабло «Дайдидау» әнін қазақ тілінде орындап, көрермен мен қазылар алқасын ерекше әсерге бөледі. Оның вокалдық шеберлігі, орындау мәнері мен сахнадағы келбеті Димаштың өзін айнытпай еске салды. Көрермендер өнерпазды ұзақ қол шапалақпен қарсы алды.

Шоу үзіндісі әлеуметтік желілерде лезде тарап, Қазақстан мен Латын Америкасы елдерінде қызу талқыланды. Көптеген қолданушылар: «Дауысы мен тембрі Димашқа өте ұқсас», «Қазақ тіліндегі ән әдемі әрі әсерлі естіледі» деп пікір қалдырды.