Ел спортшылары Жапонияда конькимен жүгіруден екі алтын еншіледі

Наганода (Жапония) өтіп жатқан конькимен жүгіру спортынан Әлем кубогының алғашқы кезеңінде Қазақстан спортшылары жақсы нәтиже көрсетіп, екі алтын жеңіп алды. Ұлттық Олимпиада комитетінің мәлімдеуінше, сайыстың алғашқы күнінде 500 және 1500 метр қашықтықтарда жарыстар өтті. Біздің елдің спортшылары бұл жарыстарда тек В дивизионында өнер көрсетті. Әйелдер арасында 500 метр қашықтықта Кристина Силаева бірінші орынды жеңіп алды. Инесса Шумекова 15-орынға, Маргарита Галиева 18-орынға, ал Дарья Важенина 20-орынға ие болды. Ерлер арасында Евгений Кошкин төртінші нәтиже көрсетсе, Алтай Жәрдембекұлы 11-ші, Никита Важенин 20-орынға тұрақтады. Сондай-ақ, 1500 метр қашықтықта әйелдер арасында Надежда Морозова үздік нәтиже көрсетті. Кристина Шумекова 15-орынға, ал Мария Деген 22-орынға ие болды. Ерлер арасындағы 1500 метрлік жарыста Нұралы Ақжол 29-орынға, Роман Биназаров 31-орынға тұрақтады. Айта кетейік, А дивизионындағы медальдар ғана есептеледі. Фото: ҰОК