Ер адам өзінің жерлеу рәсімінде тіріліп кетті

Үндістанда қайтыс болды деп есептелген ер адам жерлеу рәсімі барысында тіршілік белгілерін көрсетті. Ол шұғыл түрде ауруханаға жеткізілді. Бұл туралы NDTV басылымы жазды.

Бірнеше күн бұрын ер адам ауыр жарақат алып, жеке клиникаға жатқызылған. Дәрігерлер оның жағдайы үмітсіз екенін айтып, туыстарына оны құтқару мүмкін еместігін жеткізген. Осыдан кейін отбасы жерлеу рәсімін ұйымдастыра бастаған.

Алайда жерлеу рәсімі кезінде ер адамның қозғалып, жөтелгені байқалған.

"Біз жерлеу рәсіміне дайындалып жатқанда, ол кенеттен қимылдай бастады да, жөтелді. Біз оны дереу аудандық ауруханаға жеткіздік. Қазір ол өкпені жасанды желдету аппаратына қосылған. Жағдайы ауыр, бірақ тұрақты", – деді науқастың туыстарының бірі.

Сонымен қатар, басылым аурухана әкімшілігі отбасының сөзін жоққа шығарғанын атап өтті. Дәрігерлердің айтуынша, туыстары науқастың жағдайы туралы берілген ақпаратты дұрыс түсінбеуі мүмкін.