Ер адам үш айлық сәбиін кір жуғыш ұнтақ толы шелекке батырып өлтірген

АҚШ-тың Индиана штатына қарасты Лафайетт қаласында ер адам үш айлық ұлын қатыгездікпен өлтіргені үшін ұзақ мерзімге бас бостандығынан айырылды.

2024 жылдың 10 тамызында тұрмыстық зорлық-зомбылық белгілері бар әйел дәрігерлерге жүгініп, олардың шақыруымен оқиға орнына полиция келді. 29 жастағы ер адамның әйелі құқық қорғау органдарына күйеуінің монтировка мен кілтпен ұрып-соққанын айтқан. Алайда ол ең алдымен күйеуінің үш айлық баласын белгісіз жаққа алып кеткеніне алаңдаушылық білдірген.

Бастапқыда полиция ер адамның үйін тінтіп, баланы таппаған. Ол сәби жоғалуына қатысы жоқ екенін айтып, тек әйеліне шабуыл жасағанын мойындаған. Алайда келесі күні тәртіп сақшылары үйді қайта тексеріп, асүйден апельсин түсті шелектің ішінен сабын қосылған суда жатқан сәби денесін тапқан. Сот-медициналық сараптама нәрестенің суға тұншығып қайтыс болғанын көрсетті.

Типпекано округінің прокуроры Элис Мэдиганның айтуынша, күдікті кейін қылмысын мойындап, мұндай қадамға не үшін барғанын түсіндірген. "Ол әйеліне және жалпы барлық әйелдерге сабақ бергісі келгенін, ер адамдарға құрметсіздікпен қарауға болмайтынын көрсету мақсатында осындай әрекетке барғанын айтты", – деді прокурор.

Сот шешімімен, сәбиін өлтіріп, әйелін өлтіруге оқталған ер адам 92 жылға бас бостандығынан айырылды.