Ғалымдар адамзаттың Жер бетінен жойылып кететін жылын анықтады

NASA және Жапонияның Тохо университетінің ғалымдары Жердегі тіршіліктің жойылу мерзімін анықтады,деп хабарлайды POLITICO.KZ  inbusiness.kz сайтына сілтеме жасап.

Ғылыми зерттеулерге сәйкес, бұл процесс 1 000 002 021 жылы орын алуы мүмкін. Сарапшылардың пікірінше, сол уақытқа дейін адамзат ғарышта өмір сүруге қолайлы жаңа мекен тауып, отарлауды бастауы қажет.

Зерттеу нәтижелері Күннің эволюциясы барысында көлемінің ұлғаюын көрсетеді. Бұл процесс Жерге таралатын жылу мен радиацияның артуына әкеледі, нәтижесінде атмосфера өзгеріп, тіршілікке қажетті оттегі деңгейі күрт төмендейді. Температураның шектен тыс көтерілуі тіршілік атаулының жойылуына себеп болуы мүмкін.

Ғалымдар суперкомпьютерлік модельдеу арқылы Жерде тіршілік ету мүмкін болмайтын мерзімді есептеді. Сонымен қатар, технологиялық жетістіктердің арқасында апаттың алдын алу немесе кешіктіру мүмкіндігі қарастырылуда. Мысалы, жабық экожүйелерде ауа мен су өндіру әдістерін дамыту арқылы адамзаттың бір бөлігі тіршілігін жалғастыра алады.

Бұл тұрғыда Илон Масктың SpaceX жобасы ерекше назар аудартады. Ол 2026 жылы Starship ғарыш кемесін Марсқа жіберуді, ал алғашқы адамдардың Қызылжұлдызға 2029-2031 жылдары жетуін жоспарлап отыр. Бұл миссия адамзаттың ғарышта өмір сүру мүмкіндігін кеңейтетін маңызды қадам болмақ.

Қазіргі таңда ғаламдық ауқымда апаттың алдын алу шаралары жеткіліксіз. Дегенмен, ғылыми қауымдастық бұл мәселеге ерекше көңіл бөліп, болашақта адамзаттың аман қалу жолдарын іздестіруде.