Израиль әскері Газа секторындағы Палестина-Түркия достық ауруханасын жарып жіберді

Газа секторының солтүстігінде орналасқан Палестина-Түркия достық ауруханасы Израиль армиясының шабуылына ұшырады, деп хабарлайды POLITICO.KZ.

Anadolu агенттігінің мәліметінше, Израиль тарапы бұл аурухананы ХАМАС қозғалысы әскери мақсатта пайдаланғанын алға тартып, нысанды "бейтараптандырдық" деп мәлімдеді.

Израиль армиясының ресми мәлімдемесіне сәйкес, аурухана "әскери командалық орталық" ретінде қолданылып, оның аумағынан Израиль күштеріне шабуылдар жасалған. Осыған байланысты нысан толығымен жойылған.

Жергілікті дереккөздер растап отыр

Аурухананың және оған жақын орналасқан Ислам университетінің медицина факультетінің қиратылғаны туралы ақпаратты жергілікті ақпарат көздері растады. Сонымен қатар, Times of Israel басылымына берген сұхбатында Израиль армиясының өкілі бұл ғимараттың соңғы бір жылда аурухана ретінде пайдаланылмағанын айтып, соққы нақты осы нысанға бағытталғанын растады.

Әлеуметтік желілердегі реакция

Израиль армиясы аурухананың қираған сәтінің фотосуреттерін әлеуметтік желілерде жариялады. Кадрларда аурухананың қатты зақымданғаны байқалады. Бұл жайт желіде кеңінен талқыланып, халықаралық деңгейде алаңдаушылық туғызды.

Израиль аурухананы өзі де әскери мақсатта пайдаланған

Газа секторының Денсаулық сақтау министрлігі Израиль армиясының аурухананы жарып жібергенін растап, мұны айыптады. Министрлік мәліметінше, 2023 жылдың 7 қазанынан кейін Израиль әскерилері аурухананы және оның айналасын әскери база ретінде пайдалана бастаған. Онда әскери техника орналастырылғаны туралы ақпараттар бар.

15 айға созылған қақтығыстар кезінде ғимараттың өзі аман қалғанымен, оның ішіндегі медициналық жабдықтар едәуір зақымданған.

Аурухана туралы мәлімет

Палестина-Түркия достық ауруханасы 2011–2017 жылдары Түркияның Ынтымақтастық және үйлестіру агенттігі (TİKA) тарапынан салынған. Аурухана 33 400 шаршы метр аумақты қамтып, 8 блок, 4 операция бөлмесі, жансақтау бөлімдері мен зертханалардан тұрған.

Дүниежүзілік денсаулық сақтау ұйымының дерегінше, Газа секторындағы 36 аурухананың тек 18-і ғана жұмыс істеп тұр.

БҰҰ: Денсаулық сақтау саласына жүйелі шабуыл жасалып жатыр

БҰҰ Адам құқықтары жөніндегі Жоғарғы комиссарының кеңсесі Израильдің денсаулық сақтау мекемелеріне қарсы шабуылдарына байланысты алаңдаушылық білдірді. Ұйымның есебіне сәйкес, соңғы бір жыл ішінде Газа секторында 27 аурухана мен 12 медициналық орталыққа 136 рет шабуыл жасалған.