Кәрім Мәсімовтің зәулім сарайы мемлекет меншігіне өтті

Астанада сотталған экс-премьер-министр, бұрынғы ҰҚК төрағасы Кәрім Мәсімовке тиесілі болған сарай Оқу-ағарту министрлігінің қарамағына берілді, деп хабарлайды POLITICO.KZ Tengrinews.kz-ке сілтеме жасап.

Қайтарылған активтерді басқару компаниясының (ҚАБК) баспасөз қызметі аталған шешімді Мемлекеттік мүлік және жекешелендіру комитетінің бұйрығымен растап, ғимараттың Ұлттық арнайы және инклюзивті білім беруді дамыту ғылыми-практикалық орталығына бекітілгенін мәлімдеді.

Министрлік мұндай шешімнің балалар арасында ерекше білім беру қажеттіліктері барлардың көбеюімен байланысты екенін атап өтті.

Ел бойынша арнайы және инклюзивті білім беру ұйымдарының желісін кеңейту туралы шешім қабылданды. Бас орталық Алматыда шоғырланатын болады, ал басқа барлық өңірлерде, соның ішінде Астанада филиалдар ашылады, – делінген министрлік мәлімдемесінде.

Оқу-ағарту министрлігінің дерегінше, бұл қадам бірыңғай ғылыми-әдістемелік база құруға, мамандарға, ата-аналар мен балаларға қолайлы жағдай жасауға және арнайы білім беру ұйымдарының тиімділігін арттыруға мүмкіндік береді.

Инклюзивті және арнайы білім беруді дамыту – мемлекеттік саясаттың негізгі басымдықтарының бірі. Қазіргі таңда ерекше білім беру қажеттіліктері бар балаларды кешенді қолдау туралы заң ұлттық деңгейде дайындалып жатыр, – деді ведомство.