"Кішкентай Бишімбаев" деп атаған: Балабақшадағы дауға қатысты тергеу басталды

Астана қаласындағы жеке балабақшада екі жасар балаға қатысты буллинг фактісі бойынша тексеру басталды, деп хабарлайды POLITICO.KZ.

Бұл туралы 17 сәуірде ҚР Оқу-ағарту министрлігінің Балалардың құқықтарын қорғау комитеті мәлімдеді.

Комитет мәліметінше, баланың анасы мекемеге жүгініп, ұлының балабақшада "кішкентай Бишімбаев" деп атағанын және қорлық көргенін айтқан.

Осыған байланысты комитет төрайымы Насымжан Оспанова арызданушымен кездесіп, жағдайды егжей-тегжейлі талқылады.

Қазіргі уақытта оқиғаға қатысты тиісті тексеру жүргізіліп жатыр.

"Кездесу қорытындысы бойынша тексеру ұйымдастыру туралы шешім қабылданды: 28 сәуірде Білім сапасын қамтамасыз ету департаменті тиісті тексеруді бастайды. Комитет балалардың құқықтарының бұзылуына қатысты бірде-бір хабарды назардан тыс қалдырмайды. Әрбір бала қауіпсіз әрі құрметпен қарауға лайық", - деп хабарлады комитет.

Фото: pexels