Кремль ардагерлердің беделін көтеруге тырысуда

Ресей билігі соғыс ардагерлерін қоғамға ықпалды тұлға ретінде енгізу саясатын белсенді жүргізуде. Кремль оларды жоғары лауазымдарға тағайындап, бизнесте қолдау көрсетіп, несиелерін кешіріп, қоғамда ардагерлерге құрметті орынды қамтамасыз етуге тырысуда, деп хабарлайды POLITICO.KZ The New York Times басылымына сілтеме жасап.

Көптеген ардагерлер мектептерде дәріс оқып, әскери дайындық сабақтарын өткізуде. 2023 жылдың қыркүйегінен бастап Ресей мектептерінде 8-сыныптан бастап қару ұстау және әскери дайындық курсы міндетті пәнге айналған.

Кремль сонымен қатар ардагерлерді мемлекеттік басқаруға тартуға арналған «Время героев» бағдарламасын іске қосты. Бағдарлама соғыстан оралғандарды жаңа элита ретінде қалыптастыруға бағытталған. Ол басқарушылық және көшбасшылық курстардан өтіп, әкімшілік қызметтерде тағылымдамадан өту мүмкіндігін береді. Алғашқы 83 орынға 44 мың адам өтініш берген.

Президент Владимир Путин бұл бағдарламаның мақсаты елдің жаңа элитасын қалыптастыру екенін атап өтті:

"Элита – бұл Ресейге қызмет ететіндер, 90-жылдары қалталарын толтырғандар емес," – деді ол.

Кремльдің мәлімдеуінше, бағдарлама шынайы патриоттарды билікке жақындатуды көздейді. Алайда, тәуелсіз сарапшылар бұл бастаманы Кремльдің имидждік PR-құралы деп санайды.

"Қазіргі уақытта жоғары мемлекеттік қызметтерге тағайындалған ардагерлер өте аз. Бұл негізінен саяси насихат," – дейді Meduza журналисі Андрей Перцев.

"Новая газета Европа" жүргізген зерттеу нәтижесі бойынша, алғашқы «Время героев» бағдарламасына қатысқан 80 адамның 80%-ы кәсіби әскери қызметкерлер, тек үшеуі ғана мобилизацияланған сарбаздар. Сонымен қатар, үш қатысушы Украинаның арнайы қызметтері тарапынан әскери қылмыстарға қатысы бар тұлғалар ретінде аталған.

Кремль бұл бағдарламаны ақпараттық тұрғыдан кеңінен насихаттауда. Ол Путин әкімшілігінің ықпалды өкілі Сергей Кириенконың бақылауында. Путин бағдарламаны бірнеше рет мақтап, оны аймақтық деңгейде жүзеге асыруға уәде берді.