ЛАҢКЕСТІК ТОПТАРДЫҢ 300-ДЕЙ ОШАҒЫ АНЫҚТАЛДЫ

  Шанхай ынтымақтастығы ұйымына мүше елдерде кейінгі 3 жылда лаңкестік топтардың 300-ге жуық ошағы анықталды. Әрі сепаратизм мен экстремизмді насихаттаған жүздеген сайт бұғатталды. Бұл жайлы Ташкентте өткен өңірлік терроризмге қарсы құрылым кеңесінің 41-ші отырысында айтылды. Жиынға Қазақстан, Үндістан, Иран, Қытай, Қырғызстан, Пәкістан, Ресей, Тәжікстан және Өзбекстанның құзіретті орган өкілдері қатысты. Тараптар жыл басында Иран және таяуда Ресей мен Пәкістанда болған террорлық актілерді қатаң айыптап, мәлімдеме жасады. Құрылымның күн тәртібіндегі күрделі сын-қатерлер сараланды. Руслан Мирзаев, ШЫҰ ӨТҚҚ атқарушы комитетінің директоры: - Кейінгі 3 жылда ұйымға мүше мемлекеттердің өкілетті органдары өңірлік терроризмге қарсы құрылымның күшімен халықаралық лаңкестік топтардың 280-нен астам ошағын анықтап, жолын кесті. Заңсыз айналымнан 7,5 мың қару мен жарылғыш заттар алынды. 225 мың оқ-дәрі тәркіленіп, терроризм, сепаратизм, экстремизмді насихаттаған 320 мыңнан астам сайт бұғатталды. Отырыста бірқатар құжатқа қол қойылды және Қазақстан ұсынған Шанхай тоғыздығына мүше елдердің аумағындағы бейбітшілікке қауіп төндіретін жағдайларға қарсы іс-қимыл шарасы бекітілді. Сондай-ақ, шекара қызметтерінің «Ынтымақ – 2024» бірлескен шекара операциясын өткізу мәселесі талқыланды.