«Махаббатыңызды тапсаңыз, бізге қарамаңыз»: Ләйлә Сұлтанқызы ұлдарының ауыр кеңес беретінін айтты

Танымал тележүргізуші және журналист Ләйлә Сұлтанқызы әлеуметтік желідегі парақшасында ер жеткен ұлдарымен әңгімесімен бөлісті, деп хабарлайды POLITICO.KZ. 

«Бұл жолы ұзақ сөйлестік. Әдетте видеоға сирек түсетін, рұқсаттарымен ғана сөйлесетін 16 және 18 жастағы ұлдарыммен достық форматта пікірлестім. Тым жекеге бармаймын — ұялам ба, әлде «өздері біледі ғой» деп ойлаймын ба, білмеймін. Бірақ қыздарға деген құрмет, жауапкершілік, тұрақтылық жайлы жиі айтамын — бұл мен үшін ең маңыздысы», - дейді ол.

Ләйлә Сұлтанқызы кейде ұлдарымен пікірі келіспей, ұрысып қалатынын да айтты.

«Ондайда эмоцияға берілмей, отырғызып сөйлесемін, түсіндіремін, кешірім сұратып, татуластырамын. Үлкеніне көбірек сенім артамын: үйдің шаруасын, інісінің ортасын, ұсақ-түйек жөндеу, бақылау – бәрін соған тапсырамын. «Әкесінің орнында сезінсін» деймін. 25-ке дейін үйленемін деп отыр.
Жақында үлкен ұлым «махаббатыңызды тапсаңыз, бізге қарамаңыз» деді. Күлкілі де, жүрекке де тиетін сөз болды. Махаббат туралы жиі сөйлесеміз - бәлкім жастық әсері шығар, бірақ ересек адамдай әңгіме айтады. Қысқасы, ұлдарыммен достық, сенім және жауапкершілік туралы әңгімелесемін. Ал махаббат — сол әңгіменің ең жылы бөлігі», - деп түйіндеді Ләйлә Сұлтанқызы.