Аудан әкімі Боқаевтың айыптауына жауап беріп, ескі тастардың қайда кеткенін түсіндірді

Алматыдағы Уәлиханов көшесіндегі скверде тас төсеніштерді ауыстыру жұмыстары қоғамда үлкен дау тудырды. Қоғам белсендісі Санжар Боқаев «жаңаға жуық тастарды» алып, жекеменшік аумаққа тасып жатыр деп дабыл қақса, Медеу ауданының әкімі Еркебұлан Оразалин бұл айыптауларды жоққа шығарып, ресми жауап берді, деп хабарлайды POLITICO.KZ.

Даудың басталуына белсенді Санжар Боқаевтың әлеуметтік желіде жариялаған бейнесі себеп болды. Ол өз зерттеуін жүргізіп, Уәлиханов көшесіндегі жақсы күйдегі тас төсеніштерді алып тастап, оның орнына жаңасын төсеуге 446 млн теңге бөлінгенін айтып, мұны жемқорлық деп атады. Белсендінің сөзінше, ескі тастар белгісіз бір жеке тұлғаның ауласына жеткізілген.

Бұл айыптаудан кейін Медеу ауданының әкімі ресми жауап беріп, жағдайды түсіндірді. Әкімдіктің мәліметінше:

Тас төсеніштер ескірген: Бұл төсеніштер 20 жылдан астам уақыт бойы, яғни 2004 жылдан бері пайдаланылған. Материал ескіріп, тозған және қазір өндірістен шығарылған.
Бюджет екі жобаға бөлінген: Белсенді айтқан сома бір ғана нысанға емес, екі бөлек жобаға арналған: Уәлиханов көшесіндегі жұмыстарға – 296 млн теңге, ал Қарасай батыр көшесіндегі жөндеуге – 204 млн теңге. Бұл жұмыстарға тек тас төсеу ғана емес, сонымен қатар жарықтандыру, автосуару жүйесін орнату және көгалдандыру да кіреді.
Ескі тастар қайда кетті? Әкімдіктің айтуынша, алынған ескі тастарды мердігер компания өз қоймасында сақтайды және олар кейін кәдеге жарату (утилизация) үшін Алматы облысына шығарылады. Сонымен қатар, ескі тастардың бір бөлігі мұқтаж отбасыға көмек ретінде берілген.