Мемлекетке 4,5 миллиард теңге залал келтірді деген компанияның басшысы мәлімдеме жасады
«OrdaMed» АҚ негізін қалаушы Еркін Длімбетов медициналық жабдықтарды фальсификациялады және мемлекет бюджетіне миллиардтаған залал келтірілді деген айыптауларға қатысты ресми мәлімдеме жасады, деп хабарлайды Politico.kz
Кәсіпкер компанияның жабдықтарды қолдан жасамағанын, барлық техниканың зауыттық өндірістен шыққанын және медициналық ұйымдарға нақты жеткізілгенін мәлімдеді.
«Мен, Еркін Длімбетов, «OrdaMed» АҚ негізін қалаушысы және басшысы ретінде, бірқатар БАҚ-та тараған медициналық жабдықтарды қолдан жасады деген ақпаратқа қатысты жеке түсініктеме беруді жөн санаймын.
Ашық әрі нақты мәлімдеймін: «Ordamed» АҚ медициналық жабдықтарды қолдан жасаған жоқ. Біздің компания жеткізген жабдықтар – зауытта өндірілген, тіркелген және Қазақстанның медициналық ұйымдарына іс жүзінде жеткізілген нақты, сериялық өнім болып табылады», – деді кәсіпкер.
Оның айтуынша, жабдықтардың барлығы нақты жеткізілген, пайдалануға берілген, медицина қызметкерлері тарапынан қолданылуда және айлар мен жылдар бойы мемлекеттік және жеке клиникаларда диагностикалық әрі емдік қызметтер атқарып, жұмыс істеп тұр.
«Бұл жерде, әрі бұл аса маңызды, әңгіме жабдықты қолдан жасау немесе жоқ өнімді жеткізу туралы емес, өткен жылдардағы өндірісті жергіліктендіру және құжаттамалық ресімдеу мәселелеріне қатысты жекелеген өндірістік және ұйымдастырушылық процестерді құқықтық тұрғыдан түсіндіру туралы болып отыр.
Фальсификация тауарды ауыстыруды, оның жоқтығын немесе имитациясын білдіреді.
Ал біздің жағдайда тауар бар, оны мемлекет пен пациенттер пайдалануда және оның бар екенін еліміз бойынша мыңдаған дәрігер мен медициналық мекеме оңай растай алады», – деді Еркін Длімбетов.
Кәсіпкердің айтуынша, компания ешқашан жоқ тауар немесе жалған жеткізілім үшін бюджеттен қаражат алмаған.
««OrdaMed» АҚ ешқашан «ауа» үшін, жалған жеткізулер немесе жоқ жабдықтар үшін ақы алған емес. Мемлекеттік келісімшарттар іс жүзінде орындалды, ал бұл келісімшарттардың нәтижесі – жұмыс істеп тұрған медициналық аппараттар – күнделікті көз алдымызда және тексеруге ашық.
Біз компаниямыздың беделін жоғары бағалаймыз және ол үшін клиенттер алдында да, акционерлер алдында да жауап береміз. «OrdaMed» АҚ құрылтайшыларының арасында құрметті кәсіби мамандар, соның ішінде шетел азаматтары да бар.
Компания айналасындағы бұл шудың бәрін бәсекелестеріміз ұйымдастыруы мүмкін екенін де жоққа шығармаймыз, өйткені оларға Қазақстан нарығында мықты халықаралық ойыншылардың болғаны тиімсіз.
Мен баса айтамын: қандай да бір процедуралардың заңдылығына тек сот қана баға бере алады және беруі тиіс. Бұл тергеу аяқталмай жатып кінәлі деген әсер қалдыратын жария мәлімдемелер арқылы жасалмауы керек», – деп мәлімдеді «OrdaMed» АҚ негізін қалаушысы және басшысы Еркін Длімбетов.
Бұған дейін Ұлттық қауіпсіздік комитеті фармацевтика саласындағы ірі қылмыстық схеманы әшкерелегенін хабарлаған болатын. Тергеу мәліметінше, компания шетелден әкелінген жабдықты «отандық өнім» деп көрсетіп, жеңілдетілген шарттармен сатқан. Салдарынан мемлекетке 4,5 миллиард теңге шығын келген.
Тінту жұмыстары кезінде 1 миллиард теңгеден астам сомаға инвестициялық монеталар тәркіленіп, күдіктілердің үлестеріне тыйым салынды. Қазіргі уақытта компанияның бірқатар бұрынғы және қазіргі басшылары тергеу изоляторында отыр.
Соңғы жаңалықтар
