Мүгедектігі бар балалардың спортқа қатысу ақысын 70–100% өтеу ұсынылды

Құрылтай депутаты Елдос Баялышбаев мүгедектігі бар балалардың спорт үйірмелеріне қатысу шығынын 70–100% өтеуді ұсынды, деп хабарлайды Politico.kz.

«Әділет» фракциясының мүшесі бұл ұсынысын Премьер-министр Олжас Бектеновке жолдаған депутаттық сауалында айтты. Балалар үйіне жақын бассейндерге, спорт секцияларына, фитнес орталықтары мен басқа да қолжетімді нысандарға баруы керек. Бұл олардың денсаулығын нығайтып, ортамен араласуына көмектеседі.

Ұлттық статистика бюросының дерегінше, 2025 жылдың соңында Қазақстанда 18 жасқа толмаған 120 013 мүгедектігі бар бала тіркелген. Олардың арасында ақыл-ойы мен оқу қабілеті толық сақталған, бірақ қимыл-қозғалысы шектеулі балалар бар.

Депутаттың айтуынша, бұл балалар білім алып, спортпен айналысып, болашақта өз қабілетін іске асыра алады. Алайда орта мен қолдау шаралары олардың жеке қажеттіліктеріне үнемі сай келе бермейді.

Баялышбаев қолданыстағы инклюзивті білім беру жүйесінде осы балаларға арналған ресурстық сыныптар мен оқу бағдарламаларын қарастыруды ұсынды. Оқу күндізгі немесе жеке форматта, қажет болса, жекелеген пәндер бойынша онлайн өтуі тиіс. Бала толыққанды білім алып, қауіпсіз ортада өзгелермен араласуға мүмкіндік алуы керек.

Сондай-ақ депутат оқу әлеуеті жоғары мүгедектігі бар адамдардың «Болашақ» бағдарламасына қатысуына арнайы тетіктер, соның ішінде бөлек квота қарастыруды сұрады. Оның пікірінше, физикалық шектеулер үздік шетелдік университеттерде оқуға кедергі болмауы қажет.

Тағы бір ұсыныс – мүгедектігі бар адамдар мен олардың ата-аналарына жыл сайын өнертабыстар байқауын өткізу. Оған ортопедиялық құрылғылар, бейімделген жиһаз, оңалту және спорт жабдықтары жобаларын ұсынуға болады.

Депутат күнделікті қиындықтарды осы адамдардың өздері жақсы білетінін атап өтті. Ол пилоттық жоба аясында өнімнің алғашқы үлгісін жасаудан бастап нарыққа шығаруға дейінгі бүкіл кезеңін қаржыландыратын гранттар бөлуді ұсынды.