«Мұның қажеті не?»»: Дана Нұржігіт ресейлік шоуға қатысқан әнші Әміреге ренішін айтты

Танымал тележүргізуші Дана Нұржігіт ресейлік шоуға қатысып жатқан қазақстандық әнші Әміре туралы пікір білдірді, деп хабарлайды Politico.kz.

Тележүргізуші бұл туралы өзінің желідегі парақшасында жазды.

«Біздің жұлдыздарға мұндай шоуға қатысудың не керегі бар? Ернар – әлдеқашан ел мойындаған әнші. Ол – вокал бойынша біліктілігі жоғары, мықты маман. Оны бағалау үшін осындай бағдарламаларға қатысудың не керегі бар?! Біздің өнерпаздар үшін ішің ашиды екен. Ол өнерге енді ғана тәй-тәй басып келе жатқан бала емес. Ернардың өз жолы бар суреткер. Біреудің мойындауына зәру емес!», — деді тележүргізуші.

Айта кетейік, қазақстандық өнерпаз, Amre деген атпен танымал Ернар Садырбаев ресейлік НТВ телеарнасындағы «Браво! Бис!» шоуында таңғажайып өнер көрсетіп, қазылар алқасының жоғары бағасына ие болып, финалға өтті.