Олжас Бектенов жаңа Көлік министріне жол сапасы мен құрылыс мерзімдері бойынша бірқатар тапсырма берді

Қазақстандағы ірі көлік-логистикалық құрылыс жобалары сапаны жоғалтпай, белгіленген мерзімде аяқталуы тиіс. Премьер-министр Олжас Бектенов бұл міндетті Көлік министрлігінің жаңа басшысы Әсел Жанасованың алдына қойды, деп хабарлайды Politico.kz.

Үкімет басшысы жаңа министрді ведомство ұжымына таныстыру барысында саладағы басты басымдықтарды атап өтті:

Автомобиль жолдарын салу және жөндеу сапасын қатаң бақылауда ұстау;

Жол бойындағы сервис пен инфрақұрылымды халықаралық стандарттарға сай дамыту;

Автомобиль өткізу пунктерін қайта жаңарту жұмыстарын 2027 жылы толық аяқтау.

— Келесі жылы көлік саласының барлық бағыттары бойынша ірі жобаларды пайдалануға беру жоспарланған. Олардың сапалы әрі уақытылы жүзеге асырылуын қамтамасыз ету қажет, — деп баса айтты Олжас Бектенов.

Премьер-министр алдағы жылдың «Ауқымды құрылыс жылы» болып жарияланғанын еске салып, Қазақстанның Еуразиядағы көлік-логистикалық хаб ретіндегі позициясын одан әрі нығайтуды тапсырды.