Оралда түрмеден шыққан азаматқа «Құрметті азамат» атағы берілмек болды

Орал қалалық мәслихатының депутаттары Құрметті азамат атағын беру мәселесін талқылау кезінде қоғамда үлкен дау туғызған шешімнің аз-ақ алдында тұрды, деп хабарлайды POLITICO.KZ.

HALYQSTAN telegram арнасының мәліметінше, бұл мәртебеге үміткерлер тізімінде кезінде тапсырыспен өз азаматтық жұбайы мен 8 жасар қызын өлтірмек болғаны үшін сотталған Хайрулла Исмагуловтың есімі де болған.

Құрметке лайық па?

Ресми құжаттарда Исмагулов «еңбек ардагері», «рационализатор», «көптеген марапат иегері», сондай-ақ «облыс оқырмандарына танымал әдеби шығармалар авторы» ретінде сипатталған. Алайда, оның жуырда ғана түрмеден шыққаны туралы ештеңе айтылмаған.

Қылмыстық оқиғаның егжей-тегжейі

Исмагулов Ақтөбе қаласының тұрғыны болған жас әйелмен поезда танысып, олар арасында роман басталады. Үш жылдан соң қыз бала дүниеге келеді. Алайда ол некесін ресми түрде тіркемей, бір уақытта Ақтөбе мен Орал қалаларында екі отбасымен қатар өмір сүріп келген.

Уақыт өте келе әйел адамның Исмагуловтан әкелікке сараптама жасауды талап етуі оны шошытып, қылмысқа итермелеген. Ол бірнеше орындаушы іздеп, кейбіреуі ақшаны азсынса, өзгелері уәдесінен айнып кетеді. Ақырында, келісім берген адам құқық қорғау органдарының астыртын агенті болып шығып, кісі өлтіруді инсценизациялау арқылы Исмагулов қолға түседі.