Павлодарда ойын орталығында бала бес метр биіктіктен құлап, ауруханаға түсті

Павлодарда Viking Land ойын орталығында төрт жасар бала лабиринттің жоғарғы қабатынан бес метр биіктіктен құлап, ауруханаға түсті, деп хабарлайды POLITICO.KZ.

Бала бас миының шайқалу диагнозымен облыстық балалар ауруханасына жеткізілді.

Оқиға туралы ақпаратты баланың анасы әлеуметтік желіде таратты. Оның айтуынша, баласы ата-әжесімен бірге ойын орталығына барған кезде, лабиринттің қауіпсіздік шаралары сақталмауы салдарынан құлап кеткен.

«Менің ұлымды ол жерден шығарған кезде мұрны мен аузынан қан ағып, қатты қорқып қалған еді. Ортаңғы ұлым да сол жерден құлай жаздады, бірақ аяғы ілініп қалды», – деп жазды ол.

Баланың анасы кінәлілерді жазалауды талап етті. Оның айтуынша, балалардың қауіпсіздігі бірінші орында болуы тиіс.

Бұл жағдайды Павлодар облысындағы балалар құқығы жөніндегі уәкіл Сауле Шакенова бақылауына алды.

«Қазіргі уақытта бала анасының жанында ауруханада жатыр. Анасы полицияға арыз берді. Мен процесті соңына дейін бақылауда ұстаймын», – деп жазды ол Instagram парақшасында.

Полиция мәліметінше, процессуалдық шешім сот-медициналық сараптама нәтижелерінен кейін қабылданады.

«Бала жарақаттарымен ауруханаға жатқызылды. Емдеу аяқталған соң, медициналық құжаттар негізінде сараптама тағайындалады. Нәтижесіне байланысты процессуалдық шешім қабылданады», – деп хабарлады Павлодар облысы Полиция департаментінің баспасөз қызметі.

Сондай-ақ, тексеру аясында жауапты тұлғалардың әрекеттеріне құқықтық баға беріледі.

Ақпарат cmn.kz сайтынан алынған.