Қарағандылық фермер ондаған жылқыны қырып салды

Қарағанды облысында фермер 17 жылқыны атып тастаған оқиға қоғамда үлкен резонанс тудырды, деп хабарлайды POLITICO.KZ сайты.

Оқиға 28 қыркүйекте Нұра ауданына қарасты Заречное ауылы маңында болған. Малшылардың айтуынша, жергілікті фермер өз егіс алқабына кіріп кеткен жылқыларды көлігімен қуалап жүріп, оқ атқан. Салдарынан 14 жылқы сол жерде қаза тапқан, қалғандары ауыр жараланған.

Мал иелері енді істің әділ тергелуін талап етуде. Олар күдіктінің ірі жер иесі екенін айтып, істің жабылып қалуынан қорқады.

Қарағанды облыстық полиция департаменті бұл факті бойынша Қылмыстық кодекстің 202-бабы «Бөтеннің мүлкін қасақана жою немесе бүлдіру» бойынша іс қозғалғанын хабарлады. 53 жастағы Нұра ауданының тұрғыны ұсталып, тергеу амалдары жүргізіліп жатыр.