Қайрат Боранбаев Назарбаевтар отбасын «Реалмен» болатын ойынға шақырмағанын айтты

Қайрат Боранбаев Назарбаевтар отбасын «Реалмен» болатын ойынға шақырмағанын айтты, деп хабарлайды Хроника басылымы.

Жақында желіде «Қайрат» футбол клубы мен тұңғыш президенттің отбасына қатысты бір ақпарат тарады. Онда Назарбаевтар отбасы «Қайрат» пен «Реал Мадрид» арасындағы ойынға арнайы шақырту алды деп жазылған. Алайда, бұл ақпаратты клуб иесі Қайрат Боранбаевтың өзі жоққа шығарды.

Әңгіме неден басталды?

Бастапқыда Ertenmedia агенттігі қызық жаңалық жариялады. Агенттіктің жазуынша, 30 қыркүйекте өтетін үлкен футбол ойынына Назарбаевтар отбасы толық құрамда келеді екен. Басылымның жазуынша, оларды ойынға «Қайрат» клубының қожайыны Қайрат Боранбаев арнайы шақырған.

Бұл ақпараттың шындыққа жанасатынын көрсету үшін олар бірнеше жайтты мысалға келтірген. Мысалы, жақында ғана Дариға Назарбаева Алматыдағы Боранбаевқа тиесілі «Целинный» атты мәдениет орталығының ашылуында бой көрсеткен. Сонымен қатар, Әлия Назарбаеваның да қазір Алматыда жүргені және Нұрәлі Әлиевтің де келуі мүмкін екені жазылған. Осының бәрі Назарбаевтар отбасының ойынға келетіні туралы әңгіменің таралуына себеп болған.

Боранбаев не дейді?

Көп ұзамай, осы әңгімеге «Қайрат» футбол клубының иесі Қайрат Боранбаевтың өзі жауап берді. Ол «Хроника» атты басылымға арнайы хабарласып, тараған ақпараттың шындыққа жанаспайтынын айтты.

Боранбаевтың сөзінше, ол да, клуб басшылығы да Назарбаевтар отбасына ешқандай арнайы шақырту жібермеген. Яғни, бұл тек қауесет болып шықты.

Осылайша, футбол клубы бұқаралық ақпарат құралдарында тараған бұл ақпаратты толығымен жоққа шығарды.