«Қазақмыс» басшысы кеншілермен кездесіп, қауіпсіздік мәселесін талқылады

«Қазақмыс» корпорациясының Басқарма төрағасы Руслан Өскенәлi Батыс кенішінің жұмысшыларымен кездесті, деп хабарлайды Politico.kz.

Басқарма төрағасы кеніш ұжымымен арнайы жүздесіп, өндірістегі өзекті мәселелерді талқылады. Жиында негізінен кенішті жаңғырту, жұмысшылардың қауіпсіздігін күшейту және әлеуметтік жағдайды жақсарту жайы сөз болды.

Руслан Өскенәлі жұмыс сапары барысында кеніштегі инфрақұрылымның қазіргі жағдайымен танысты. Мамандар оған өндіріске заманауи технологияларды енгізу жоспары мен оның болашағы туралы баяндады. Бұл жаңғырту жұмыстары корпорацияның тұрақты дамуы мен жұмыс өнімділігін арттыру үшін қажет. Компания осы арқылы әлемдік нарықтағы бәсекеге қабілеттілігін күшейтуді көздеп отыр.

Кездесуде еңбек қауіпсіздігі мәселесіне ерекше назар аударылды. Кеніш басшылары өндірістік жарақат алу деректерін азайту мақсатында қандай шаралар атқарылып жатқанын айтты. Сондай-ақ жұмысшыларды оқыту, тәуекелдерді бақылау және қорғаныс құралдарын жаңарту мәселелері пысықталды.

Корпорация басшылығы еңбек ұжымы алдындағы міндеттемелерін толық орындайтынын жеткізді. Компания алдағы уақытта да өндірісті жаңартуға, қауіпсіз еңбек жағдайын жасауға және қызметкерлердің әлеуметтік жағдайын жақсартуға инвестиция құюды жалғастырады.