Қазақстанда әйел құқығын қорғауға арналған жаңа «Ban» клипі жарық көрді

Республика күніне орай «Жаңа адамдар» қоғамдық қозғалысы Özim атты жаңа қыздар тобының «Ban» атты дебюттік бейнебаянын таныстырды. Бұл музыкалық туынды заманауи Қазақстандағы әйелдердің рөлінің өзгеруіне және олардың құқықтарын қорғауға бағытталған соңғы заңнамалық өзгерістерге арналған, деп хабарлайды POLITICO.KZ.

Жоба авторларының айтуынша, бұл клип соңғы жылдары елде қабылданған алып қашу, сталкинг және тұрмыстық зорлық-зомбылыққа қарсы заңдардан шабыт алған. Музыкалық туынды жаңа дәуірдің символына айналып, әрбір әйелдің құқығы мен қадір-қасиетін қорғаудың маңызын көрсетеді.

Мемлекет басшысы Қасым-Жомарт Тоқаевтың бастамасымен соңғы жылдары әйелдерді қорғауға бағытталған бірқатар заңнамалық өзгерістер қабылданған еді. Сол түзетулердің аясында отбасылық-тұрмыстық зорлық-зомбылық, қудалау және мәжбүрлі некеге итермелеу үшін жауапкершілік күшейтілді. Қазақстан Орталық Азия мен ТМД кеңістігінде мәжбүрлеп некеге тұрғызу үшін қылмыстық жауапкершілік енгізген алғашқы ел болды.

«"Ban" - әйелдің қорғалуына, естілуіне және құрметті болуына деген құқығы туралы ән. Бұл - заңдары қоғамның сұранысын бейнелейтін ел үшін мақтаныш», - дейді Özim тобының мүшелері.

Бейнебаян электронды ырғақ, этникалық әуен және рэп элементтерін біріктіріп, өзіне сенімді, еркін және шығармашыл қазақ әйелінің бейнесін бейнелейді.

«Бүгінде Қазақстандағы әйел өз қауіпсіздігінің заңмен бекітілгенін мақтан ете алады. Алайда одан да маңыздысы - қоғамда сыйластық пен жауапкершілік мәдениетін өзіміз қалыптастыру. Біз мұны "Ban" клипінде жеткізгіміз келді: музыканың тілімен жаңа құндылықтар мен ертеңге деген сенімділік туралы айттық», - деді «Жаңа адамдар» қозғалысының өкілі Адалят Рахидинова.