Қазақстандықтарға Тәуелсіздік күніне орай біржолғы ақшалай төлем беріледі

Астана қаласында Қазақстан Республикасының Тәуелсіздік күніне орай азаматтардың жекелеген санатына біржолғы ақшалай әлеуметтік төлем қарастырылған. Бұл әлеуметтік көмек 1986 жылғы 17–18 желтоқсан оқиғаларына қатысқан, саяси қуғын-сүргін құрбандары болып табылатын азаматтарға көрсетіледі, деп хабарлайды POLITICO.KZ.

Біржолғы әлеуметтік төлемнің көлемі 60 айлық есептік көрсеткішті (АЕК) құрайды.

2025 жылы бұл сома – 235 920 теңге.

Аталған төлем Астана қаласының мәслихатының 2023 жылғы 3 қазандағы шешімімен бекітілген әлеуметтік көмек көрсету, оның мөлшерін белгілеу және көмек алушылар санатын айқындау қағидаларына сәйкес жүзеге асырылады.

Астана қаласының жұмыспен қамту және әлеуметтік қорғау басқармасының мәліметінше:

 «Қазақстан Республикасының Тәуелсіздік күніне (16 желтоқсан) орай, “Жаппай саяси қуғын-сүргін құрбандарын ақтау туралы” ҚР Заңына сәйкес ақталған, 1986 жылғы 17–18 желтоқсан оқиғаларына қатысқан саяси қуғын-сүргін құрбандарына 60 АЕК мөлшерінде біржолғы ақшалай әлеуметтік көмек көзделген».