Қазақстанның бірнеше қаласында радикалды топ мүшелері ұсталды

Қазақстанның бірнеше ірі қаласында деструктивті діни ағымдардың белсенді мүшелері ұсталды, деп хабарлайды Politico.kz сайты Ұлттық қауіпсіздік комитетіне сілтеме жасап.

Комитеттің баспасөз қызметі таратқан мәліметке сүйенсек, қараша айында Алматы, Ақтөбе, Қонаев және Шымкент қалаларында арнайы жедел іс-шаралар жүргізілген. Нәтижесінде, терроризмді насихаттады деген күдікпен 6 адам қолға түсті.

Тергеу болжамы бойынша, күдіктілер тек оңашада ғана емес, ғаламтор кеңістігінде де белсенділік танытқан. Олар әлеуметтік желілер арқылы діни негізде шабуыл жасауға және кісі өлтіруге арандататын үндеулер таратқан. Сонымен қатар, бұл топтың мемлекеттің зайырлылық қағидаттарына және қоғамдық тәртіпке қарсы шыққаны айтылады.

Тінту жұмыстары кезінде ұсталғандардан заттай айғақтар табылды. Жедел уәкілдер олардың жасырынған жерінен атыс қарулары мен суық қаруларды, сондай-ақ тыйым салынған діни әдебиеттердің қомақты топтамасын тәркіледі. Соттың санкциясымен барлық күдікті қамауға алынды. Қазіргі таңда тергеу мүддесіне орай өзге ақпарат жариялауға жатпайды.

Айта кетейік, радикалды көзқарасы үшін жаза арқалағандар мұнымен шектелмейді. Мәселен, 3 қараша күні тура осындай қылмыстық әрекеті үшін, яғни терроризмге шақыратын материалдар таратқан Ақтөбе облысының тұрғыны 7 жылға бас бостандығынан айырылған болатын. Бұл үкім қазір заңды күшіне енді.

Жалпы статистикаға үңілсек, жыл басынан бері ҰҚК органдарының жедел жұмысы нәтижесінде террористік және экстремистік әрекеттері үшін 83 адам ұсталып, 97 адамға қатысты сот үкімі шыққан.