«Қазақтың үлесі 40-тан 75%-ға өсті». Экономист қандастар жетістігі туралы

Белгілі кәсіпкер Абай Серіктің «Қандастардың тарихи отанына оралуынан Қазақстанға қандай нақты пайда бар?» деген сауалына экономист Ербосын Нұрмұхан жауап берді. Сарапшының айтуынша, шеттегі ағайынның атамекенге қоныс аударуы — құр сандық көрсеткіш емес, елдің стратегиялық дамуына серпін берген соны серпіліс, деп хабарлайды Politico.kz.

Экономист қандастар көшінің мемлекетке тигізген оң ықпалын үш негізгі стратегиялық бағытқа бөліп көрсетті.

1. Экономикалық ықпалы: 90-жылдардан бері қандастарымыз Қазақстанның экономикалық жүйесінің өзгеруіне зор ықпал етті. Нарықтық экономикаға көшу кезеңінде, мал шаруашылығы күйреген тұста, олар келіп, бұл саланы қайта жандандырды. Сонымен қатар жиһаз өндірісі, құрылыс және сауда-саттық салаларын дамытуда қандастардың қосқан үлесі өте зор болды.
2. Тілдік ортаның дамуы: Қандастар қазақ тілінің мәртебесін көтеріп, тілдік жүйеміздің өзгеруіне ықпал етті. Көшіп келген 1,5 миллион қандасымыздың ұрпағын қосқанда, бүгінде олардың саны 3 миллионға жетті. 3 миллион адам — бұл 20 миллион халықтың шамамен 7-ден 1 бөлігі. Ал мұндай үлкен үлес тілдік ортаға және қазақ тілінің өрістеуіне әсер етпей қоймайды.
3. Демографиялық өсім: Тәуелсіздік алған жылдары қазақтардың үлесі елде 40 пайызға да жетпейтін болса, қандастардың көші-қоңының арқасында бұл көрсеткіш 75 пайызға дейін өсті. Бұл өсім келешекте 80-90 пайызға жеткенде, тілге қатысты түйткілдер де өздігінен шешіледі.

«Сондықтан қандастарымыздың елге қосқан үлесі осы үш бағыт бойынша да өте жоғары деп есептеймін», — деп қорытындылады сөзін экономист.