“Қоштасу хатын жазған”: Таразда оқушы мектеп ғимаратынан құлап, жансақтау бөліміне түсті

Тараз қаласында №40 гимназия аумағында болған оқиға бойынша қылмыстық іс қозғалды, деп хабарлайды Politico.kz.

Бұл туралы қалалық полиция департаменті хабарлады. Ведомство мәліметінше, аталған дерек бойынша Қазақстан Республикасы Қылмыстық кодексінің 114-бабы 3-бөлігімен іс тіркелген. Қазіргі уақытта полиция қызметкерлері оқиғаның барлық мән-жайын анықтап жатыр. Тергеу мүддесіне байланысты өзге ақпарат жарияланбайды.

Алдын ала мәліметтерге сәйкес, оқиға таңертең болған. 10-сынып оқушысы гимназия ғимаратының сыртындағы өрт сөндіру сатысына көтерілген. Бейнебақылау камераларында оның қоршауда отырғаны, кейін тепе-теңдігін жоғалтып, төмен құлағаны түсірілген.

Сондай-ақ, жасөспірім оқиға алдында WhatsApp чатында қоштасуға ұқсас хабарламалар жазғаны айтылуда.

Құлағаннан кейін оқушы облыстық балалар ауруханасына жеткізілді. Дәрігерлер оған ауыр жарақаттар қойған: ми жарақаты, сүйек сынулары және ішкі ағзалардың зақымдануы. Қазіргі уақытта ол жансақтау бөлімінде жатыр, жағдайы өте ауыр деп бағалануда.

Ақпаратқа сәйкес, жасөспірім сабақты жақсы оқыған және түрлі білім беру үйірмелеріне қатысқан. Бұған дейін онымен профилактикалық жұмыстар жүргізілгенімен, анасы психологиялық-педагогикалық қолдаудан бас тартқаны белгілі болды.

Сонымен қатар, оқиға мектеп аумағындағы қауіпсіздік мәселесін де көтерді. Күндіз мектеп ауласы ашық болып, бөгде адамдардың еркін кіруіне мүмкіндік бар.

Қазіргі уақытта оқиғаның барлық мән-жайы анықталуда.