Қостанайда 61 жастағы зейнеткерді соққыға жыққан

Қостанайда зейнеткерді соққыға жыққан қызметкерлердің видеосы елді шулатты, деп хабарлайды POLITICO.KZ порталы.

Жақында әлеуметтік желіде Қостанай қаласындағы Бейімдеу және детоксикация орталығында болған сұмдық оқиғаның видеосы тарады. Кадрлардан орталық қызметкерлерінің камерада темекі шеккені үшін 61 жастағы ер адамды аяусыз соққыға жыққанын көруге болады.

Әңгіме неден басталды?

Бұл видеоны жәбірленушінің туыстары жариялаған. Онда орталық қызметкерлерінің ер адамның қолындағы темекіні алып қойғаннан кейін де оны аяғымен тепкілеуді жалғастырғаны анық көрінеді. Соққылардың ауырлығы сондай, салдарынан ер адамның оң жақ бүйрегіне көптеген зақым келіп, дәрігерлер оны алып тастауға мәжбүр болған. Сонымен қатар, оның қабырғалары да сынған.

Полиция не дейді?

Қостанай облысының полиция департаменті бұл оқиға бойынша түсініктеме берді. Олардың айтуынша, бұл жағдай биыл шілде айында болған. Сол кезде денсаулыққа қасақана ауыр зиян келтіру фактісі бойынша қылмыстық іс қозғалған.

Күдікті қызметкерлер ұсталып, уақытша ұстау изоляторына қамалған.

"Қазіргі уақытта барлық қажетті тергеу әрекеттері жүргізіліп жатыр. Жақын арада қылмыстық істің материалдары сотқа жолданады", - деп хабарлады полиция өкілдері.