Ресей Сумы қаласына соққы жасағанын мойындады

Ресей Украинаның Сумы қаласына жасалған зымыран шабуылын мойындады, деп хабарлайды POLITICO.KZ.

Financial Times басылымының жазуынша, Ресейдің Қорғаныс министрлігі Украинаның солтүстік-шығысындағы Сумы қаласына баллистикалық зымыран соққысын жасағанын ресми түрде растады. Шабуыл салдарынан кемінде 34 бейбіт тұрғын қаза тауып, 119 адам жараланған. Дегенмен, Мәскеу бейбіт тұрғындардың қазасына Киев билігін кінәлап отыр.

Ресей тарапы бұл шабуыл Украинаның әскери командирлері жиналған ғимаратқа жасалғанын және оның нәтижесінде 60-тан астам украиналық әскери қызметші қаза тапқанын хабарлады. Алайда, бұл мәліметке қатысты ешқандай дәлел келтірілмеді.

Сондай-ақ, Ресей Қорғаныс министрлігі Украинаны халықты «тірі қалқан» ретінде пайдаланып, әскери нысандарды халық тығыз орналасқан аудандарда орналастырған деп айыптады.

Бұл арада Ресейдің шабуылды мойындаған мәлімдемесі АҚШ президенті Дональд Трамптың бір күн бұрын айтқан сөздерімен қарама-қайшы келеді. Трамп Ресей «қателік жібергенін» мәлімдеген болатын.

Ресейлік мемлекеттік БАҚ бұл шабуылды Украина тарапы АҚШ пен Ресей арасындағы келіссөздерді бұзу мақсатында ұйымдастырған болуы мүмкін деп, сондай-ақ азаматтардың қазасына Украинаның әуе қорғаныс жүйесі кінәлі деп ақпарат таратқанымен, бұл болжамдар расталған жоқ.

Ал Украинаның Жоғарғы Радасының депутаты Марьяна Безуглая мен Конотоп қаласының мэрі Артём Семенихин жексенбі күні таңертең, шабуыл жасалған уақытта, қалада әскери рәсім жоспарланғанын жариялады. Олар Сумы облысының әкімі Владимир Артюхты халықты қауіп-қатерге ұшыратты деп айыптады.

Безуглая өзінің Facebook парақшасында іс-шараға шақыру хатын жариялап, онда көрсетілген уақыт шабуылмен сәйкес келетінін жазды. Ал Семенихин тікелей эфирде Артюхты Ресейге террористік шабуылды ақтау үшін себеп берді деп сынға алды.

Артюх болса, бұл айыптауларға жауап беруден бас тартқан.

Қазір Украина қауіпсіздік қызметі (СБУ) мен прокуратурасы бұл шабуылға қатысты әскери қылмыс фактісі бойынша іс қозғады. Киевтегі СБУ орталық басқармасы мен президент кеңсесі оқиға күні Сумы қаласында шынымен де әскери рәсім жоспарланған-жоспарланбағанын анықтау мақсатында тергеу жұмыстарын бастады.