Роза коуч тағы да ажырасқандар туралы айтып, басы дауға қалды

Танымал коуч Роза ер адамдардың ажырасқан соң екінші рет тез үйленуінің себебін түсіндірді. Бұл туралы ол журналист Әйгерім Есенәліге берген сұхбатында айтты, деп хабарлайды POLITICO.KZ Azattyq Rýhy сайтына сілтеме жасап.

Сұхбат барысында жүргізуші Әйгерім Есенәлі ер адамдардың ажырасқаннан кейін бірден жаңа отбасын құруға асығатынын атап өтіп, оларға ойлануға уақыт беру керектігін айтты. Осы пікірге жауап берген Роза коуч ерлердің тұрмыстық мәселелерді өз бетінше шеше алмайтынын, сондықтан қайта үйленуге мәжбүр болатынын жеткізді.

«Көптеген ер адам анасынан әйеліне "ұзатылып" келеді. Бізде қыздар емес, еркектер ұзатылады. Кейін ажырасқаннан кейін олар басқа әйелге "ұзатылып" кетеді. Өйткені олар тұрмыстық мүгедектер», – деді коуч.

Оның айтуынша, ер адамдар бала кезінен тұрмыстық өмірге икемсіз болып өседі. Сондықтан жалғыз қалғанда үй шаруасын жүргізуде, тамақ әзірлеуде және басқа да тұрмыстық істерде қиындықтарға тап болады. Бұл оларды тез арада жаңа жар іздеуге итермелейді.