«Сенімімді ақтамады»: Астанада Ұлдана Мырзуанның қазасына қатысты сотта марқұмның анасы мәлімдеме жасады

Астана сотында Ұлдана Мырзуанның қазасына қатысты қозғалған қылмыстық іс бойынша кезекті сот процесі өтіп жатыр. Сот отырысы барысында марқұмның анасы Сәлима Ешанқұлова журналистерге сұхбат беріп, істің әділ шешілуін талап ететінін және күйеубаласының әрекетіне көңілі толмайтынын жеткізді, деп хабарлайды Politico.kz сайты kursiv сайтына сілтеп.

Марқұмның анасы ешкімге арнайы жаза сұрап, айып таққысы келмейтінін білдірді.

«Әділдік орнаса деймін. Ешкімге жаза сұрап, айып таққым да келмейді. Күйеубалам басында «басынан аяғына дейін қиянат жасамаймын» деп уәде берген еді. Бірақ ол сенімімді ақтамады», — деді Сәлима Ешанқұлова.

Сонымен қатар ол сот басталар алдында Ұлдананың күйеуі Әділет Зейнелдің марқұмның туыстарымен тілдеспегенін және өзін «бөтен адам сияқты» ұстағанын атап өтті. Бұған дейін Әділет Зейнелдің адвокаты оның бұл істе «жәбірленуші» мәртебесінен бас тартатынын мәлімдеген болатын. Марқұмның анасы күйеубаласының бұл шешімі туралы журналистерден естігенін айтты.