«Шешіндіріп, тізерлетіп қойды»: Ақтаулық әйел зорлық көргенін айтып, буллингке ұшырады

Сарвиноз Фазылова өзін зорлау мен бопсалаудың құрбаны атандым дейді. Бірақ полицияға арыз жазған соң, оған керісінше жала жабу және қоқан-лоқымен айып тағылған. Әйел блогерлердің қысымына ұшырап, тіпті суицидке баруға әрекеттенгенін айтады. Қазір іс қайта қозғалды, бірақ сонымен қатар Фазылованың өзіне қарсы қылмыстық істер де ашылған, деп хабарлайды POLITICO.KZ centralmedia24.kz сайтына сілтеме жасап.

Бұрынғы дауға байланысты БАҚ-та аты шыққан

Сарвиноз Фазылова алғаш рет 2016 жылы ақпарат құралдарында аты аталды. Ол кезде бұрынғы күйеуімен соттасып жүрген. Даудың себебі – балалардың тұрғылықты жері еді. Сот шешімі бойынша қызы анасымен, ал ұлы әкесімен қалуға тиіс болған. Әйел екі баласын да өзіне қалдыруға қол жеткізді.

Бұл оқиғаға сол кезде көпшілік назар аударған, себебі отбасындағы жанжал күйеуінің кенеттен екінші әйелін (токалын) үйге әкелуінен туындаған болатын. Ол жылдары мұндай жағдай қоғам үшін тосын еді.

2024 жылғы оқиға және блогерлердің араласуы

2024 жылы Сарвиноз тағы бір оқиғаға тап болды. Бұл жолы әлеуметтік желіде үлкен шу шықты. Әйел Instagram-да (онда ол Асма деген атпен танымал, Ақтау қаласындағы косметолог) өзін зорлады деп жазды. Бірақ ол қолдаудың орнына жаппай хейт пен қудалауға тап болды.

Оның айтуынша, 2023 жылы бір ер адаммен танысып, 7 айдай араласқан. Кейін олар айырылысып кеткен. Бірақ Сарвиноздың негізгі шағымы бұрынғы серігіне емес, оның досы Рамазан Кустабаевқа қатысты болды. Әйелдің сөзіне сенсек, Рамазан оны жалаңаш күйде видеоға түсіріп, қорқытқан және екі рет зорлаған.

Бірінші эпизод: «Ол мені төрт сағаттай қинады»

Фазылованың айтуынша, ол Рамазанға жұмысына байланысты көмектескен. Нақтырақ айтқанда, оның компаниясына таргеттелген жарнаманы баптап берген. 2024 жылдың қыркүйегінде Алматыға жұмыс сапары ұйымдастырылды.

«Мен өз шаруаларыммен бардым, сонымен бірге көрмеге түсірілім жасап, жарнама қосуым керек болды», – дейді ол.

Алайда сапардың алдында, 2 қыркүйекте, ол сауда орталығында эскалатордан құлап қалған.

«Екі аяғымнан терімді сыдыртып алдым, жүре алмайтын күйде едім. Сондай халде Алматыға бардым», – дейді косметолог.

Әйелдің сөзінше, ол қонақүйде бөлек бөлмеге өз ақшасына орналасқан, ал жұмыс беруші өз қызметкерлерімен бірге тұрған.

«Аяғым іріңдеп, қызуым көтерілді. Сол себепті рецепциядан ауырсынуды басатын дәрі сұрадым. Дәріні Рамазан әкеліп берді. Оны ішкеннен кейін жағдайым нашарлап, галлюцинация сияқты белгілер пайда болды. Терезе мен есік қозғалып тұрғандай көрінді», – дейді Сарвиноз.

Әрі қарай жағдай тіпті ушығып кеткен.

«Рамазан мені күштеп шешіндіріп, тізерлетіп қойып, видеоға түсірді. Ол бұрынғы жігітімнен кешірім сұрауымды талап етті. Мен жалаңаш күйде тізерлеп тұрып, кешірім сұрадым. Ол мені шамамен төрт сағаттай қинады. Қарсыласуға дәрменім болмады: аяғымда терең жаралар бар еді, әлі де тыртықтары қалған. Дәрі әсерінен мүлде дәрменсіз болдым. Ол мені зорлады да: “Полицияға барсаң, видеоны блогерлерге беремін” деді», – деп еске алды Сарвиноз Фазылова.

Ол ер адамның Ақтаудағы байланыстарынан қатты қорыққанын айтады.

«Осыдан кейін мен үнемі қорқынышта жүрдім. Мен хиджаб киемін, қалада көп адам таниды. Видеоны таратып жіберсе, масқарадан өле-өлгенше құтыла алмаймын деп қорықтым. Тіпті өз-өзіме қол жұмсау туралы ойладым», – дейді әйел.