Шымкентте "Қиял әлемі" паркін сүруге шешім қабылданды

Шымкентте сот шешімімен "Қиял әлемі" аттракциондар паркін сүруге бұйрық берілді, деп хабарлайды POLITICO.KZ.

2011 жылы коммерциялық фирма мегаполистің орталығынан жер телімін жалға алып, балалар орталығын ашуы тиіс болған. Алайда оның орнына аттракциондар паркі салынды. Соңғы жылдары бұл парк бірнеше рет даулы оқиғалармен ел назарына іліккен болатын.

2021 жылдың мамыр айының соңында 17 жастағы қызметкер аттракционнан құлап, қаза тапты. 2023 жылдың маусымында парктің бір аттракционын өртеп жіберген оқиға тіркелді. Сондай-ақ бір келуші аттракционда жүргенде жүрек талмасынан көз жұмды.

2024 жылдың шілдесінде қала әкімдігі парктің жер телімін коммуналдық меншікке қайтару туралы шешімге қол жеткізді. Кейін әкімдік бұрынғы жалға алушыдан жер телімін бастапқы күйіне келтіруді талап етіп, сотқа жүгінді.

"Сотта серіктестік аттракциондар, әткеншектер және басқа да құрылғыларды пайдалануға қабылдау актілерін заңға сәйкес тіркегенін растайтын дәлелдер ұсынған жоқ. Бұл жағдайлар мен жер учаскесін заңсыз пайдалану фактісін ескере отырып, сот талапты қанағаттандырды", – делінген Жоғарғы сот хабарламасында.