Солтүстік Қазақстанда су тасқынының екінші толқыны басталды

Солтүстік Қазақстанда су тасқынының екінші толқыны басталды және оның алғашқыға қарағанда әлдеқайда күшті болу ықтималдығы жоғары. Бұл туралы POLITICO.KZ сайты КТК арнасына сілтеме жасап хабарлайды.

"Қазгидромет" РМК СҚО филиалының директоры Қымбат Мерғалимова қазіргі таңда судың көтеріліп жатқанын және екінші толқынның нақты басталғанын растады. Оның айтуынша, су деңгейінің көтерілуіне Ақмола облысынан келген ағындар себеп болып отыр. Сергеев су қоймасындағы судың деңгейі соңғы төрт сағат ішінде 1 сантиметрге артқан.

 “Петропавл қаласы маңында да 5-10 сәуір аралығында су деңгейі қайта көтеріледі”, – деді Мерғалимова.

Петропавлға тасқын су осы аптаның соңына қарай жетуі мүмкін. Гидрологтар нақты болжамды екінші толқын толық келгеннен кейін ғана жасай алады. Қазіргі уақытта тек су деңгейінің тұрақты көтерілуі тіркелуде.

Қауіпті аймақтар:

Заречный шағын ауданы

Есіл өзенінің жайылмасы

8 мыңға жуық саяжай

Республикалық маңызы бар автожолдар

Су тасқынының екінші толқыны бірінші толқынмен қосылып кетуі мүмкін, бұл жағдайда қауіп тіпті күшейе түспек. Қазіргі сәтте бұл деңгейге жетпегенімен, бірқатар қиындықтар туындап үлгерді. Мәселен, күні кеше айналма жолдың бір бөлігін су басып қалды. Су тасқынының тереңдігі 10 сантиметрге, ал ені 20 метрге жетті.

СҚО Төтенше жағдайлар департаментінің Жоспарлау және жедел басқару орталығының бастығы Владимир Хутинаев мәліметінше, "Петропавл қаласын айналып өту" автожолының 27-шақырымы су астында қалды. Қазіргі таңда жол қозғалысы ашық күйінде қалып отыр. Алайда, жағдай ушыққан жағдайда жүргізушілерге арналған балама бағыттар туралы ақпараттық белгілер дайындалған.