Томский кәсіпкер мен бизнесмен айырмасын түсіндірді

inDriver компаниясының негізін қалаушы Арсен Томский "кәсіпкер" мен "бизнесмен" ұғымдарының аражігін ашып берді. Оның пайымдауынша, бұл жай ғана атауға қатысты мәселе емес, оның артында іске және өмірге деген мүлде бөлек екі көзқарас жатыр, деп хабарлайды POLITICO.KZ Digitalbusiness.kz-ке сілтеме жасап.

Томский бірден бұл пікірге біржақты қарайтынын ескертті, себебі ол өзін "бизнесмен" емес, "кәсіпкер" санатына қосады. Ол бір кездері өзінің де бизнесмен болғанын, бірақ ол ойдан көп жыл бұрын арылғанын ашып айтты. Кәсіптің басты мәні пайда табуда емес, керісінше, сол істі бастауға итермелейтін терең мағына мен асқақ арманда жатқанын түсінген.

Өз сөзін дәлелдеу үшін ол Якутияда болған бір оқиғаны мысалға келтірді.

"Мен өзімді бизнесмен сезінген соңғы кезім осыдан талай жыл бұрын Якутскіде болды. Сол кезде үш контейнер сатып алып, олардан шағын азық-түлік дүкендерін аштым. Мақсатым – тек пайда табу еді", – деп еске алды Арсен Томский.

Алайда, бірнеше айдан кейін ол бұл дүкендерін үлкен жеңілдікпен, тіпті қуана-қуана жауып тастаған. Себебі, бұл істің әбігері көп болып, оны негізгі жұмысынан алаңдатқан. Бірақ ең бастысы – бұл кәсіпте ешқандай терең, материалдық емес мән болмапты. Томский бұл жағдайды тіпті өз кітабында "жырық шұлық үшін ұлы шайқас" деп атапты.

Дәл осы оқиғадан кейін ол өзін толықтай "кәсіпкер" деп санай бастаған.

"Сол уақыттан бері мен өзімді кәсіпкермін деп есептеймін. Яғни, көп жылдарға алға көзқарасы, армандары, мақсаттары және терең мағынасы бар адам. Мен ішкі мотивация мен күшті дәл осылардан аламын", – деп түсіндірді inDriver негізін қалаушы.

Сөз соңында ол бұл мысал арқылы екі ұғымды өзі үшін қалай ажырататынын көрсеткісі келгенін жеткізді. Ол екі мамандыққа да үлкен құрметпен қарайтынын және ешкімнің көңіліне тигісі келмегенін атап өтті.