Тоқаевтың «Ana Tili» газетіне берген сұхбатындағы маңызды мәселелер

Қасым-Жомарт Тоқаев «Ana Tili» газетіне берген сұхбатында Қазақстанның қазіргі әлеуметтік-экономикалық мәселелері, Қаңтар оқиғасы, АЭС құрылысы және Назарбаевпен байланысы жайлы айтты, деп хабарлайды POLITICO.KZ.

Теңге құлдырауы және экономикалық сын

Президент теңгенің қазіргі құлдырауына әлемдік экономикадағы факторлардың әсер етіп жатқанын атап өтті.

«Доллардың нығаюы дамушы елдердің валютасына қысым көрсетуде. Біз бұл жағдайды теңгеге байланысты көріп отырмыз,» – деді ол.

Тоқаев экономикалық басшылардың жұмысына да сын айтып, нақты нәтижелердің жетіспейтінін атап өтті.

Қаңтар оқиғасы: сабақтар және саясат

Қаңтар оқиғасына қатысты сұраққа жауап бере отырып, Тоқаев билік консолидациясының маңыздылығын ерекше атап өтті.

«Қос билікке ешқашан жол берілмеуі керек. Біздің міндет – тұрақтылық пен заң үстемдігін сақтау,» – деді Президент.

АЭС құрылысы: жаңа жоспарлар

Қазақстанда бірінші атом электр станциясын салу жөніндегі конкурс осы жылы өтеді. Сонымен қатар, Тоқаев болашақта екінші және үшінші АЭС салу мүмкіндігін жоққа шығармады.

«Қазақстан ядролық энергетикасы дамыған елге айналуы керек,» – деп мәлімдеді ол.

Талғар оқиғасы және қандастардың жауапкершілігі

Талғардағы қылмысқа байланысты тергеу жұмыстары аяқталды. Президент қандастардың Қазақстан заңдарын қатаң сақтауы тиіс екенін ескертті.

«Қазақ халқы тарихи Отанына оралған қандастарды жылы қабылдады. Олар осы құрметті бағалап, заңсыз әрекеттерден аулақ болуы қажет,» – деді ол.

Назарбаевпен қарым-қатынас

Тоқаев Нұрсұлтан Назарбаевпен ай сайын телефон арқылы сөйлесіп тұратынын айтты.

«Бұл кездесулерге бастамашы болып жүрген – Нұрсұлтан Әбішұлының өзі,» – деді Тоқаев.