Трамп Байденнің қару-жарақ экспортын шектейтін ережесін алып тастады

АҚШ президенті Дональд Трамп Байден әкімшілігінің АҚШ қаруын адам құқықтарымен байланыстыру жөніндегі директивасын ресми түрде жойды, деп хабарлайды The Washington Post.

Бұл ереже 2024 жылдың ақпан айында Байденнің бұйрығымен қабылданған болатын. Ол Израиль мен ХАМАС арасындағы қақтығыста бейбіт тұрғындардың қаза табу санын азайту мақсатында АҚШ одақтастарына қару-жарақ беруді шектеуді көздеген.

Алайда, Трамп әкімшілігі бұл шешімді өзгертіп, қару-жарақ экспортын шектеусіз жүргізуге рұқсат берді. Ақ үй бұл қадамды "Америка бірінші орында" атты жаңа сыртқы саясат стратегиясының бір бөлігі ретінде қарастырып отыр.

Құжатқа сәйкес, енді АҚШ одақтастары америкалық қаруды халықаралық гуманитарлық құқық нормаларына сәйкес қолдану туралы міндеттеме алмай-ақ пайдалана алады. Сарапшылардың пікірінше, бұл шешім Израиль, Сауд Арабиясы және басқа да АҚШ одақтастарына әскери операцияларда шектеусіз қару қолдануға мүмкіндік береді.

Сыншылар Трамптың бұл шешімін адам құқықтарын қорғау қағидаларын елемеу және АҚШ қаруын шексіз пайдалануға жол ашу деп бағалап отыр.