Трамптың Ресейге қарай бетбұрысы АҚШ-тың ондаған жылдық саясатын өзгертіп жатыр

АҚШ президенті Дональд Трамп Ресеймен қарым-қатынасты түбегейлі өзгертіп, Путинмен әріптестік орнатуға ниетті екенін білдірді, деп хабарлайды The New York Times.

Бұл шешім АҚШ-тың ондаған жылдық сыртқы саясатына қайшы келуі мүмкін.

The New York Times басылымының хабарлауынша, Трамп Америка Құрама Штаттарының дәстүрлі одақтастарынан бас тартуға дайын екенін көрсетіп отыр. Ол Ресейдің Украинаға шабуылы үшін жауапкершілікті Мәскеуге артудың орнына, Киевті кінәлап, украин басшылары территориялық талаптарға көнбегені үшін қақтығыстың ұзаққа созылғанын мәлімдеді.

"Сіздер бұны бастамауыңыз керек еді. Келісімге келуге болатын еді", – деді Трамп украиндықтарға қарата.

Сондай-ақ, ол Киевтің бейбіт келіссөздерге қатысуына қарсы екенін білдіріп, "қазіргі басшылық бұл соғыстың басталуына жол берді" деп мәлімдеді.

Ең таңғаларлығы, Трамп бұл мәлімдемелерінде Путин мен Ресейге қатысты ешқандай сын айтпады.

"Ресей оқшауланудан құтылуы керек. Біз оларды халықаралық аренаға қайта қабылдауға тиіспіз", – деді Трамп.

Осылайша, Ақ үй басшысы Мәскеуді қайтадан әлемдік дипломатиялық клубқа қосып, оны АҚШ-тың жақын серіктестерінің біріне айналдыруға ниетті екенін білдірді.

Сарапшылардың пікірінше, бұл – АҚШ сыртқы саясатының соңғы бірнеше онжылдықтағы ең үлкен өзгерістерінің бірі.