Үш баласы қалды: танымал әншіні күйеуі өлтіріп тастады

Тайлак ауданында орын алған ауыр қылмыс өзбек музыка қауымдастығын дүр сілкіндірді. 26 шілде күні 35 жастағы әнші Зебинисо Носирова, сахнада Zeboyi Jahon есімімен танымал өнер иесі, қатыгездікпен өлтірілді.

Бұл қайғылы жағдай туралы алғаш болып Milliy TV телеарнасының Millar бағдарламасы хабарлаған.

Қылмыстық оқиғаның мән-жайы

Алдын ала тергеу деректеріне сәйкес, әншінің өліміне басты күдікті — оның 1992 жылы туған күйеуі. Ол Зебинисо тұратын үйге балаларын көру мақсатында келген. Алайда бұл кездесу жанжалға ұласып, арты қылмысқа соққан. Ер адам әйелімен сөзге келіп қалып, оны тұншықтырып өлтірген. Оқиға орнына келген медициналық қызметкерлер әйелдің көз жұмғанын растаған.

Жәбірленушінің туыстары не дейді?

Марқұмның жедел жәрдем қызметінде жұмыс істейтін інісі оқиға күні болған жайттармен бөлісті:

«Менің әпкем ондай өлімге лайық емес еді. Сол күні жұмыста болдым. Сағат 4-тер шамасында әйелім қоңырау шалып, “әпкеңе бірдеңе болған” деді. Анама хабарластым — ол “жедел жет, оны өлтіріп кеткен” деді. Үш баланың анасын, жарыңды қалайша бұлай өлтіруге болады?!»

Ол кінәлі адамға ең ауыр жаза қолдануды сұрап, құқық қорғау органдарына үндеу жасады.

Ресми мәлімет

Өзбекстан Бас прокурорының баспасөз хатшысы Хаёт Шамсутдинов бұл ақпаратты растады. Күдіктіге қатысты Қылмыстық кодекстің 97-бабы, 1-бөлігі бойынша (қасақана кісі өлтіру) қылмыстық іс қозғалған. Қазіргі уақытта ол қамауға алынып, тергеу изоляторында.