"Ұсталған болар": Журналист Атыраудағы іске басты күдікті туралы болжамын айтты

Атырау облысында із-түссіз жоғалып кеткен отбасыға қатысты ақпарат таратқан журналист Жанат Молдашова бұл іске байланысты сұхбат берді, деп хабарлайды Politico.kz.

Ол YouTube желісіндегі «Алаш Орда» арнасының тілшісі Серік Жолдасбайға берген сұхбатында басты күдікті Сұлтан Сәрсемалиевтің тағдырына қатысты өз болжамын айтты.

Журналист құқық қорғау органдарының күдіктіні елге қайтару мүмкіндігі туралы сұраққа жауап бере отырып, оның ұсталып, экстрадициялау үдерісі басталып кетуі ықтимал екенін жоққа шығармады.

«Құзырлы органдар күдіктінің шетелде екенін бейресми түрде айтты, алайда ресми ақпарат таратқан жоқ. Менің болжамым бойынша, ол қазірдің өзінде ұсталған да болуы мүмкін. Елге қайтару процестері жүріп жатқандай әсер қалдырады. Бұл – тек менің жеке ойым, нақты ақпарат жоқ», – деді Жанат Молдашова.

Тілші қазіргі уақытта құзырлы органдардың ресми жауабын күту керектігін айтты.