Зеленский: Путинге дипломатия қажет емес

Украина президенті Владимир Зеленский Ресейдің бүгінгі күндегі шабуылдары туралы мәлімдеп, Кремльге қысымды күшейту қажеттігін айтты, деп хабарлайды POLITICO.KZ.

«Өкінішке қарай, бүгін тағы да шабуылдар мен соққылар жасалды. Черкассы облысы – дрондардың шабуылына ұшырады. Херсон облысында артиллерия мен дрондар қарапайым тұрғын үйлер мен адамдарға қарсы қолданылды. Донецк облысында басқарылатын авиабомбалар, артиллерия және дрондар шабуылдады. Запорожье мен Днепр облыстары да дрондар мен басқарылатын авиабомбалардың астында қалды. Сумы мен Харьков облыстарында да осы жағдай қайталанды», – деді Зеленский.

Украина президентінің айтуынша, Ресейдің шабуылдары күн сайын жалғасып, олардың ауқымы мен қатыгездігі дипломатиялық шешімдерге бейілділік танытпайтынын анық көрсетуде.

«Бұл Ресейдің президенті Путиннің дипломатияны елемейтінінің нақты дәлелі. Біз бірнеше апта бойы америкалық тараптың шартсыз бітім туралы ұсынысын ұстанып келеміз. Алайда Ресей оған жауап ретінде күн сайын шабуылдарын жалғастыруда. Бізге қарсы дрондар, авиабомбалар, артиллериялық соққылар мен баллистикалық зымырандар қолданылады», – деді ол.

Сондай-ақ Зеленский Ресейге қарсы санкцияларды күшейту және Украина үшін әуе қорғанысын арттыру қажеттігін атап өтті.

«Ресейге қысымды арттыру керек. Ресейдің соғысу қабілетін және оның әскери жүйесін тоқтатуға бағытталған қатаң шаралар қажет. Санкциялар, әуе қорғанысын күшейту, серіктес елдердің өзара бірлігі мен ынтымақтастығы аса маңызды», – деп түйіндеді Зеленский.