Жамбыл облысының экс-әкімі 12 жылға сотталды

Жамбыл облысының экс-әкімі 12 жылға сотталды, деп хабарлайды POLITICO.KZ.

Жамбыл облысының бұрынғы әкімі Кәрім Көкірекбаев 12 жылға бас бостандығынан айырылды.

Үкім Алматы облысының қылмыстық істер жөніндегі мамандандырылған ауданаралық сотында шығарылды. Онымен бірге оның бұрынғы орынбасары Әділет Ахатаев та 11 жылға сотталды. Екеуі де аса ірі көлемде пара алу ісі бойынша айыпталған.

Сот залында үшінші айыпталушы – "Bazis Construction Infr" ЖШС бас директоры Андрей Поплавский де болды. Ол 11 жылға бас бостандығынан айырылды. Тергеу барысында оның жалған құрылыс актілерін ұйымдастырғаны анықталды. Бұл құжаттар негізінде мемлекетке 1,9 миллиард теңге көлемінде залал келтірілген.

Облыстық соттың мәліметінше, құрылыс-монтаж жұмыстары қағаз жүзінде орындалғанымен, шын мәнінде жүзеге аспаған.