"Егер оқушы қыз балиғат жасқа толған болса, ол хиджаб киюі тиіс" - Бас мүфти

Қазақстанның бас мүфтиі Наурызбай қажы Тағанұлы никаб және хиджаб кию жайлы өз пікірін білдірді. Мәдениет және ақпарат министрлігі қазір қоғамдық орындарда әйелдердің никаб киюіне тыйым салатын заңға өзгерістер енгізуді қарастырып жатыр. Бұл идеяны Қазақстан мұсылмандар діни басқармасының төрағасы Наурызбай қажы Тағанұлы қолдады. «Біз, Қазақстан мұсылмандар діни басқармасы дін негіздерін насихаттаймыз. Никаб — бұл жүзді жабатын киім. Шариғат мұндай киім киюді міндеттемейді. Заң қабылдау құзыретімізге кірмейді. Біз тек дін нормаларын түсіндіреміз. Біз заңға бағынуымыз керек», — деді Наурызбай қажы Тағанұлы парламент палаталарының бірлескен отырысында. Сондай-ақ, мүфти мектеп оқушыларының хиджаб киюіне қатысты өз көзқарасын білдірді. Оның айтуынша, шариғат бойынша әрбір жасөспірім қыз хиджаб киюі тиіс. Намаз оқитын қыздардың бұл құқықтары қоғам тарапынан құрметтелуі қажет. Алайда, мұсылман қыздар мектеп ішінде өз ережелері бар екенін де ескеруі керек. «Егер оқушы қыз балиғат жасқа толған болса, ол хиджаб киюі тиіс. Бірақ мектептің өз ережелері бар. Білім алу да адамдардың міндеті. Балалар сауатсыз болмауы керек, бұл пайғамбардың айтқаны», — деді бас мүфти. Қазақстанда қоғамдық орындарда діни киім кию мәселесі бұрыннан талқыланып келеді. Соңғы жылдары бұл тақырып жиі көтеріліп, соңында қоғамдық орындарда діни киім киюге тыйым салу қажеттігі жоғары деңгейде талқылана бастады. Жақында Мәжіліс депутаты Ермұрат Бәпи де діни киім киюді бақылау қажеттігі туралы пікір білдірді. Ол депутаттар осы күзде тиісті заң жобасын ұсынатынын айтты.