75 тонна көк серкені заңсыз экспорттағандарға үкім шықты

75 тонна көк серкені заңсыз экспорттағандарға үкім шықты, деп хабарлайды POLITICO.KZ Қаржылық мониторинг агенттігіне сілтеме жасап.

Агенттік көлік прокуратурасының үйлестіруімен «СПК Қызылорда Балық» ЖШС басшылығына қатысты шулы тергеуді аяқтады.

Тергеу мәліметтеріне сәйкес, кәсіпорынның лауазымды тұлғалары 2022 жылы кеден органдарына жалған мәліметтер ұсынған. Олар осы әрекеті арқылы құны 254 миллион теңге тұратын, жалпы салмағы 75 тоннадан асатын көк серке етін Еуропалық одақ елдеріне заңсыз экспорттап жіберген.

Кәсіпорын бұл ірі көлемдегі балықтың шығу тегін заңдастыру үшін өте қарапайым, бірақ заңсыз схеманы қолданған. Олар балықты өздерімен байланысы бар тұлғалар мен шаруашылықтардан «сатып алдық» деген жалған құжаттар ресімдеген.

Алайда, тексеру барысында бұл схеманың былығы ашылды. Белгілі болғандай, құжатта көрсетілген шаруашылықтар шын мәнінде балық өсірумен немесе ұстаумен айналыспаған, тіпті олардың су айдындары толықтай кеуіп қалған болып шықты.

Одан бөлек, құжаттарда көрсетілген жүк көліктерінің бұл тасымалдау қызметін іс жүзінде атқармағаны, оның үстіне олардың тоңазытқыш жабдықтармен мүлдем қамтамасыз етілмегені анықталды. Тергеу барысында жалған шот-фактуралар мен заңсыз ветеринарлық анықтамалар берілгені де толық дәлелденді.

Сот үкімімен кәсіпорынның құрылтайшысы А. Ерхатов және оның директоры Л. Қайыпназарова осы қылмыстық әрекеттері үшін кінәлі деп танылды. Екеуіне де 2 жыл мерзімге бас бостандығын шектеу жазасы кесілді.

Заңсыз табылған 254 миллион теңге көлеміндегі табыс мемлекет пайдасына толықтай өндірілді.

Сот үкімі әлі заңды күшіне енген жоқ.