Алматы – Өскемен тасжолында әскери техника жол апатына себеп болды

Алматы – Өскемен тасжолында әскери техника құлап, жол апатына себеп болды, деп хабарлайды POLITICO.KZ.

"ҚазАвтоЖол" мәліметінше, апат 15 қаңтарда сағат 13:40-та Заречный ауылына жақын, жолдың 56-шақырымында орын алған.

«Трал жүргізушісі эстакададан түскен кезде жеңіл брондалған екі көпфункционалды тартқыш техника жолға құлап кеткен. Техникалар жолдың жүріс бөлігіне құлап, оларды ертіп келе жатқан Ssang Yong Actyon көлігімен соқтығысқан», – делінген хабарламада.

Апат салдарынан құрбандар мен зардап шеккендер жоқ.

Айта кетейік, осы тасжолда таңертең де ірі жол-көлік оқиғасы орын алған еді. Сол кезде 18 көлік соқтығысып, полиция оның себебі ретінде қалың тұманды атаған. Тұман көрінуді айтарлықтай нашарлатып, апатқа әкелген.