Алматылық экс-судья Светлана Жолмановаға қатысты тағы бір үкім шықты

Алматы қаласы Медеу ауданының бұрынғы судьясы Светлана Жолманова алаяқтық жасағаны үшін тағы да кінәлі деп танылып, сегіз жылға сотталды, деп хабарлайды Politico.kz порталы.

Медеу аудандық №2 соты биыл 11 ақпанда экс-судьяға қатысты жаңа шешім қабылдады. Судья Жасұлан Хусаиновтың үкімімен Светлана Жолманова Қылмыстық кодекстің 190-бабы бойынша кінәлі деп танылды.

«Жолманова Светлана Сәтбайқызы Қылмыстық кодекстің 190-бабы 4-бөлігінің 2-тармағында көзделген қылмысты жасағаны үшін кінәлі деп танылып, оған 8 жылға бас бостандығынан айыру жазасы тағайындалсын», – деп мәлімдеді сот.

Алайда бұрын шыққан қатаңырақ жазаны ескере отырып оның түпкілікті жазасы 10 жыл болып бекітілді және ол жазасын орташа қауіпсіздік мекемесінде өтейді.

Сот шешіміне сәйкес Жолманова Жәбірленушілерге өтемақы қорына 73 мың теңгеден астам мәжбүрлі төлем жасауға міндеттелді. Бұдан бөлек ол үш жәбірленушіге жалпы сомасы 168 миллион теңгеден астам материалдық шығын өтеп беруі тиіс. Нақтырақ айтқанда Ержан Рапілбековке 94 миллион теңгеден астам, Мұратбай Әнетбековке 15 миллион теңге және Қайырбек Алхаровқа 59 миллион теңге қайтаруы қажет. Бұл қарызды өз еркімен төлеуге оған отыз күн уақыт берілді.

Еске салайық, экс-судья 2025 жылдың жазында 50-ге жуық адамды алдап, аса ірі көлемде алаяқтық жасағаны үшін 10 жылға сотталған болатын. Ол сыбайласы Данияр Құшалиевпен бірге азаматтарға арзан бағада жылжымайтын мүлік алып беруге және тендерлік жобаларға қатысуға көмектесуге уәде берген. Зардап шеккендердің арасында оның жақын таныстары мен көршілері де болған.

Светлана Жолманованың есімі алғаш рет 2021 жылы жұмыс кабинетінде тінту жүргізілген шулы оқиғадан кейін белгілі болған еді. Кейін ол судьялық қызметінен босатылған.