Алматылық кәсіпкер ЭЦҚ арқылы жасалған алаяқтық схемадан зардап шекті

Алматылық кәсіпкер ЭЦҚ арқылы жасалған алаяқтық схемасы туралы дабыл қақты

Алматылық кәсіпкер әйел өз компаниясының электрондық цифрлық қолтаңба (ЭЦҚ) беру және заңды тұлғаларды тіркеу жүйелеріндегі осалдықтарды пайдаланған алаяқтардың әрекеттерінен екі рет зардап шеккенін мәлімдеді. Кәсіпкер әйел мәселесін шешу үшін Цифрлық даму министрлігіне, Ішкі істер министрлігіне және Бас прокуратураға шағымданған, алайда оның сөзінше, жағдай еш өзгермеген.

Ол SHYNDYK.KZ тілшісіне берген сұхбатында заңсыз әрекет етушілер алдымен компания басшысының атынан жалған сенімхат пен мөр дайындайтынын айтқан. Осы құжаттар арқылы олар Халыққа қызмет көрсету орталығы (ХҚКО) арқылы электрондық цифрлық қолтаңбаны (ЭЦҚ) алады. Одан әрі, egov.kz порталын пайдаланып, компания басшысы туралы деректерді өзгертеді, тиісті анықтама алып, банкке жүгініп, шотқа қол жеткізеді де, қаражатты шығарып алады.

«Мен ХҚКО-ға өзімнен басқа ешкімге ЭЦҚ бермеуді сұрап өтініш бердім, бірақ маған мұндай шектеулер мүмкін емес деп жауап берді. Осыған қарамастан, ЭЦҚ жалған құжаттар бойынша беріліп жатты», — дейді кәсіпкер әйел.

Ол сондай-ақ, Цифрлық даму министрлігіне жүйедегі осалдықтарға назар аударуды сұрап ресми өтініштер жолдаған. Оның айтуынша, министрліктің жауабында тек ЭЦҚ беру ережелері түсіндірілген.

«Мен құжаттардың жалған екенін – қолтаңба да, мөр де нағыз емес екенін түсіндірдім. Бірақ маған егер сенімхат пен мөр болса – ЭЦҚ беріледі деп жауап береді. Мен болсам, басшының өзі тиісті өтініш берсе, сенімхат бойынша ЭЦҚ беруге тыйым салу механизмін енгізуді сұраймын», — деп түсіндірді ол.

Оның сөзінше, компанияның банктік шотынан екі рет ақша жымқырылған. Үшінші рет ол банк қызметкерінің қоңырауы арқасында қаражат аударымының алдын ала алған. Ол полицияға жүгінген, алайда бір іс тоқтатылған, ал екіншісінде күдіктілер «шоттан ақшаны әлі алмағандықтан» ұсталмаған.

Кәсіпкер әйел сондай-ақ, бірде тергеуші компания бойынша заңды әрекеттерді тіркеуге шектеу қойғанын, алайда кейінірек полиция бөлімінің бастығы осы шектеулерді алып тастау туралы хатқа қол қойғанын, содан кейін компания үшінші тұлғаға қайта тіркелгенін хабарлады.

«Демек, мен алаяқтардан да, өз мемлекеттік жүйемнен де қорғалмағанмын. Егер ХҚКО қызметкерлері жалған құжаттарды ажырата алмаса, ал полиция істерді тоқтатса, онда мені кім қорғай алады?» — деп күйзеледі кәсіпкер әйел.

Дереккөз: SHYNDYK.KZ